На факультэце фізічнай культуры Купалаўскага ўніверсітэта прадставілі інавацыйную распрацоўку, якая накіравана на павышэнне канкурэнтаздольнасці нацыянальнай каманды на міжнароднай арэне і развіццё жаночага спорту ў цэлым.
Андрэй Навойчык, старшы выкладчык кафедры спартыўных гульняў ГрДУ імя Янкі Купалы, стварыў навукова-метадычную распрацоўку па падрыхтоўцы высакакласных баскетбалістаў 3х3 на прыкладзе жаночых нацыянальных каманд Рэспублікі Беларусь. У рамках сваёй працы ён правёў тэарэтыка-эксперыментальнае абгрунтаванне і распрацаваў інавацыйную методыку падрыхтоўкі, якая эфектыўна інтэгруецца ў навучальна-трэніровачны працэс прафесійных баскетбольных каманд. Гэта методыка арыентавана на спартсменаў высокага ўзроўню і накіравана на аптымізацыю іх падрыхтоўкі, што садзейнічае паляпшэнню спартыўных вынікаў.
Змест методыкі ўключае ў сябе ключавыя прынцыпы, сучасныя сродкі, разнастайныя метады і аптымальную дазоўку трэніровак. Такі комплексны падыход забяспечвае станоўчыя змены ў функцыянальнай гатоўнасці, фізічнай працаздольнасці і тэхніка-тактычных навыках удзельнікаў эксперыменту. Акрамя таго, методыка накіравана на індывідуалізацыю трэніровачнага працэсу, што дае магчымасць улічваць асаблівасці кожнай спартсменкі і максымізаваць яе патэнцыял. Праект рэалізуецца ў супрацоўніцтве з Беларускай федэрацыяй баскетбола, што падкрэслівае яго актуальнасць і значнасць для развіцця жаночага баскетбола ў краіне.
Гродзенскі дзяржаўны ўніверсітэт імя Янкі Купалы