21 жніўня ў Гродзенскім дзяржаўным універсітэце імя Янкі Купалы прайшла ўрачыстая цырымонія ўручэння сертыфікатаў слухачам эксперыментальнай адукацыйнай праграмы канікулярнай магістратуры. Дакументы аб асваенні дадатковых прафесійных курсаў атрымалі 19 магістрантаў, большасць з якіх – дзеючыя выкладчыкі, кіраўнікі структурных падраздзяленняў, а таксама настаўнікі школ і каледжаў КНР.
Да прысутных звярнуўся прарэктар па вучэбнай рабоце Лявонцій Паўлаў, які адзначыў уклад праграмы ў прафесійнае развіццё спецыялістаў і ўмацаванне міжнароднага супрацоўніцтва. Таксама на мерапрыемстве прысутнічала намесніца дэкана педагагічнага факультэта Алена Джух. Яна выказала ўпэўненасць, што новыя веды прынясуць выпускнікам большую карысць. Пасля цёплых слоў на дарогу пачалася афіцыйная цырымонія ўручэння дакументаў.
Праграма канікулярнай магістратуры рэалізоўвалася на базе двух факультэтаў Купалаўскага ўніверсітэта – педагагічнага і факультэта фізічнай культуры. Навучанне праходзіла з 3 ліпеня па 21 жніўня.
На педагагічным факультэце студэнты наведвалі наступныя тэарэтычныя курсы: «Сацыяльна-культурныя асновы класічнага танца», «Народна-сцэнічны танец і яго традыцыі», «Сучасныя метады даследаванняў і псіхолага-педагагічнага ўздзеяння ў псіхапедагогіцы», «Псіхалогія педагагічнага ўзаемадзеяння», «Псіхалагічныя асновы педагагічнай дзейнасці» і «Асновы прафесійнага самаразвіцця і псіхалагічнай кампетэнтнасці педагога».
На факультэце фізічнай культуры праходзіла навучанне па чатырох тэарэтычных курсах: «Інтэграцыя ўсходніх і заходніх рэкрэацыйна-аздараўленчых сістэм», «Тэорыя і методыка фізічнага выхавання і спартыўнай трэніроўкі», «Сучасныя праблемы фізічнай культуры і спорту» і «Сучасныя тэхналогіі аздараўленчай фізічнай культуры».
Гэтыя курсы ўключалі ў сябе не толькі тэарэтычныя заняткі, але і шырокую практычную частку. У рамках дысцыпліны «Псіхалагічныя асновы педагагічнай дзейнасці» будучыя магістры пабывалі ў дзіцячым садку № 89, дзе азнаёміліся з інфраструктурай установы, спецыфікай работы педагогаў дашкольнай адукацыі і арганізацыяй заняткаў. Гэта дало ім нагляднае ўяўленне аб тым, як будуецца адукацыйны працэс у беларускіх дзіцячых садах.
На базе дзіцячага аддзела Гродзенскай абласной навуковай бібліятэкі імя Я. Ф. Карскага адбыліся інтэрактыўны занятак. Магістрантам расказалі аб сучасных магчымасцях бібліятэкі для супрацоўніцтва са школамі і дзіцячымі садамі, а таксама прадэманстравалі інтэрактыўныя тэхналогіі, якія прымяняюцца ў сферы дашкольнай адукацыі. У аддзеле мастацтваў гэтай жа бібліятэкі для слухачоў правялі выязны занятак па курсе «Сацыяльна-культурныя асновы класічнага танца», падчас якога яны пазнаёміліся з профільным фондам па тэмах «Мастацтва і танец» і «Класічная музыка і танец».
Сваімі ўражаннямі ад навучання падзялілася выпускніца Ма Жуйфан. Яна адзначыла, што цяпер, пасля праходжання адукацыйнай праграмы, валодае навыкамі міжкультурнага параўнання, можа аналізаваць кітайскую і беларускую танцавальную і народную культуру, а таксама сістэматызаваць іх адрозненні. Акрамя таго, Ма Жуйфан падзялілася назіраннямі аб розніцы ў метадах навучання ў ВНУ Беларусі і Кітая: у беларускіх універсітэтах робіцца ўпор на самастойную і групавую работу, дзе выкладчыкі ў асноўным накіроўваюць студэнтаў, у той час як у Кітаі педагогі праводзяць сістэматычныя заняткі, на якіх навучэнцы атрымліваюць поўны аб'ём ведаў па прадмеце.
Атрыманыя базавыя веды, гарманічна дапоўненыя творчым развіццём, лічбавымі кампетэнцыямі і жывым знаёмствам з лепшымі педагагічнымі практыкамі, дазволілі кітайскім спецыялістам набыць насычаны прафесійны вопыт, які яны змогуць выкарыстаць, вярнуўшыся на радзіму.
Даведачна: усяго ў Гродзенскім дзяржаўным універсітэце імя Янкі Купалы праходзіць навучанне 101 магістрант з Кітайскай Народнай Рэспублікі. Яны асвойваюць праграмы «Адукацыйны менеджмент» і «Навукова-педагагічная дзейнасць».
Гродзенскі дзяржаўны ўніверсітэт імя Янкі Купалы