Сёння, 15 мая, пройдзе фінал аднаго з самых прыгожых маладзёжных конкурсаў у Гродне – «Краса моладзі». Удзельніцамі фінальнага этапа стануць студэнткі Гродзенскага дзяржаўнага ўніверсітэта імя Янкі Купалы і навучэнка Гуманітарнага каледжа ГрДУ.
Конкурс прыгажосці і грацыі «Краса моладзі», арганізаваны Гродзенскай гарадской арганізацыяй БРСМ, праходзіць упершыню. Праект прымеркаваны да Года беларускай жанчыны і ўжо аб'яднаў дзясяткі ўдзельніц. На кастынг прыйшлі 50 дзяўчат ва ўзросце ад 18 гадоў да 31 года, але ў фінал прайшлі толькі 10 самых яркіх прэтэндэнтак.
Сярод тых, хто прайшоў у фінал, ёсць і выдатныя прадстаўніцы ГрДУ імя Янкі Купалы. Імі сталі студэнтка другога курса факультэта эканомікі і кіравання Паліна Болбат, студэнтка першага курса факультэта псіхалогіі Кацярына Анісеня і навучэнка Гуманітарнага каледжа Данута Сухадольская.
У рамках заключнага этапу дзяўчатам трэба будзе прадэфіляваць у спартыўным і народным строях, а таксама ў вясельнай сукенцы і прадэманстраваць майстэрства прамовы ў аратарскім конкурсе.
Аб сваім удзеле ў конкурсе расказала Паліна Болбат. Яна падзялілася, што гэта не першы яе досвед: летась дзяўчына спрабавала свае сілы ў праекце «Міс і Містэр універсітэт». Таму, калі з'явілася аб'ява аб правядзенні конкурсу «Прыгажосць моладзі», студэнтка адразу вырашыла прыняць у ім удзел. Таксама Паліна адзначыла: яна лічыць, што прыгажосць – гэта не толькі знешнасць, але і ўнутраны стрыжань, і «Краса моладзі» павінна спалучаць у сабе і тое, і іншае.
– Сустракаюць па адзенні, праводзяць па розуме, і сапраўдная краса моладзі павінна аб'ядноўваць у сабе гэтыя якасці, – адзначыла Паліна Болбат.
Нашых дзяўчат чакае няпростае спаборніцтва, але кожны можа падтрымаць купалаўцаў, прагаласаваўшы за іх у намінацыі «КРАСА МОЛАДЗІ On-line».
Зрабіць гэта можна двума спосабамі: у Telegram-канале па спасылцы ці ў Instagram, пакінуўшы каментарый пад фота. Галасаванне будзе закрыта ў 18.00.
Давайце аб'яднаемся і падтрымаем Паліну Болбат, Кацярыну Анісеню і Дануту Сухадольскую!
Паліна Болбат, студэнтка другога курса факультэта эканомікі і кіравання
Данута Сухадольская, навучэнка Гуманітарнага каледжа УА «ГрДУ імя Янкі Купалы»
Кацярына Анісеня, студэнтка першага курса факультэта псіхалогіі
Гродзенскі дзяржаўны ўніверсітэт імя Янкі Купалы