Напярэдадні Дня Перамогі ў корпусе факультэта гісторыі, камунікацыі і турызму Гродзенскага дзяржаўнага ўніверсітэта імя Янкі Купалы адкрылася выстава "Вайна пасля вайны", якая расказвае пра няпросты лёс нашага народа ў гады Вялікай Айчыннай вайны.
Выстава была створана не толькі для таго, каб расказаць пра генацыд беларускага народа, але і каб нагадаць: для жыхароў Гродзенскай вобласці вайна скончылася пазней, чым для астатніх беларусаў.
Намеснік дэкана факультэта гісторыі, камунікацыі і турызму ГрДУ імя Янкі Купалы Андрэй Гецэвіч расказаў, што асноўны акцэнт у экспазіцыі быў зроблены на малавядомых старонках гісторыі - часу, калі пасля вайны працягвалася барацьба з бандытызмам, які дзейнічаў на аснове нацыяналістычных аб'яднанняў.
Расказваючы пра экспазіцыю, Андрэй Казіміравіч таксама падкрэсліў яе важнасць для захавання гістарычнай памяці:
- Гістарычную праўду аб пасляваенным перыядзе на тэрыторыі Заходняй Беларусі важна ведаць і вывучаць, даносіць яе да мас. Мы хочам, каб людзі не спажывалі той скажоны кантэнт, які складаюць заходнія карпарацыі, а ведалі, што было насамрэч.
У рамках выставы былі прадстаўлены дакументы, карты і статыстыка, якія расказваюць аб няпростых пасляваенных часах. Разам з гэтым на стэндах вывесілі партрэты супрацоўнікаў органаў НКДБ-МДБ, якія загінулі пры выкананні службовых абавязкаў на Гродзеншчыне.
Таксама ў рамках выставы арганізатары паказалі прысутным фільм аб злачынствах нацыяналістычных бандфарміраванняў, створаны Купалаўскім універсітэтам сумесна з пракуратурай Гродзенскай вобласці.
Навіна напісана па матэрыяле газеты «Гродзенская праўда».
Гродзенскі дзяржаўны ўніверсітэт імя Янкі Купалы