З 23 па 27 сакавіка ў Беларусі праходзіць заключны этап рэспубліканскай алімпіяды па 18 навучальных прадметах, у якім прымуць удзел 1564 пераможцаў рэгіянальных этапаў. Учора, 23 сакавіка, у Гродне стартаваў заключны этап рэспубліканскай алімпіяды па навучальным прадмеце "Інфарматыка".
Як паведамляе «Гродзенская праўда», на ўрачыстым адкрыцці алімпіяды прысутнічалі: начальнік галоўнага ўпраўлення адукацыі Гродзенскага аблвыканкама Руслан Абрамчык; рэктар Гродзенскага дзяржаўнага ўніверсітэта імя Янкі Купалы Ірына Кітурка; упаўнаважаны прадстаўнік заключнага этапа рэспубліканскай алімпіяды Андрэй Назарчук.
Да ўдзельнікаў мерапрыемства звярнуўся начальнік галоўнага ўпраўлення адукацыі Гродзенскага аблвыканкама Руслан Абрамчык.
- Стартаваў заключны этап рэспубліканскай алімпіяды па вучэбных прадметах. Канкрэтна ад Гродзенскай вобласці ў фіналах удзельнічаюць 209 навучэнцаў. Пераможцы абласнога тура раз'ехаліся па буйных гарадах краіны, каб пазмагацца як за льготы пры паступленні ў ВНУ, так і за званне самых таленавітых рабят у сваёй дысцыпліне, - адзначыў Руслан Юр'евіч. - Гродзенская вобласць у гэтыя дні прымае дзве алімпіяды: па грамадазнаўстве ў Лідзе і па інфарматыцы ў Гродне. Мы стварылі ўсе ўмовы, каб рабяты праявілі свае лепшыя бакі. Упэўнены, што яны знойдуць сябе ў прафесіях, звязаных з ІТ-тэхналогіямі, а пераможцы будуць змагацца за права прадстаўляць Беларусь на міжнародных алімпіядах.
Падчас мерапрыемства да навучэнцаў звярнулася рэктар Гродзенскага дзяржаўнага ўніверсітэта імя Янкі Купалы Ірына Кітурка.
- Дарагія рабяты, сімвалічна, што фінал алімпіяды праходзіць менавіта ў нашым тэхнапарку - месцы, дзе ідэі ператвараюцца ў тэхналогіі. Вы ўжо пераможцы, бо ўвайшлі ў лік лепшых з лепшых у сваёй краіне. Няхай пераможа наймацнейшы, а Гродна стане для вас горадам поспеху! – адзначыла Ірына Фёдараўна.
Заключны этап рэспубліканскай алімпіяды па навучальным прадмеце "Інфарматыка" стартаваў 23 сакавіка і працягнецца да 26 сакавіка. Мерапрыемства праходзіць на базе навукова-тэхналагічнага парка Гродзенскага дзяржаўнага ўніверсітэта імя Янкі Купалы. Удзельнікамі сталі 122 навучэнцы з розных куткоў нашай краіны. Алімпіяда ўключае два этапы, вынікі будуць падведзены 26 сакавіка па вучэбным прадмеце «Інфарматыка», па астатніх вучэбных прадметах вынікі стануць вядомыя 27 сакавіка.
Гродзенскі дзяржаўны ўніверсітэт імя Янкі Купалы