На два дні Мінск аб'яднаў вядучыя ўніверсітэты трох краін для абмеркавання міжнароднага адукацыйнага супрацоўніцтва. Тут з 27 па 28 мая адначасова праходзяць два маштабныя міжнародныя мерапрыемствы – Трэці Форум Лігі рэктараў універсітэтаў Беларусі, Бразіліі і Расіі і Шосты Форум Асацыяцыі ВНУ Расіі і Беларусі.
Мэта сустрэчы - абмеркаванне міжнароднага супрацоўніцтва, умацаванне партнёрскіх сувязей і абмен актуальнымі навукова-адукацыйнымі практыкамі. Гродзенскі дзяржаўны ўніверсітэт імя Янкі Купалы прадстаўляе на мерапрыемстве рэктар Ірына Кітурка.
У пачатку сустрэчы з прывітальным словам да ўсіх прысутных звярнуўся Міністр адукацыі Рэспублікі Беларусь Андрэй Іванец. У рамках форуму сёння, 27 мая, Ірына Фёдараўна сустрэлася з рэктарам Кубанскага дзяржаўнага ўніверсітэта Міхаілам Астапавым. Вынікам сустрэчы стала падпісанне Дагавора аб супрацоўніцтве, галоўным напрамкам якога з'яўляецца ўзаемадзеянне ў навуковай і адукацыйнай сферах. Таксама сёння Ірына Фёдараўна сустрэлася з рэктарам Ніжагародскага дзяржаўнага лінгвістычнага ўніверсітэта імя М.А. Дабралюбава Мікітай Аўралевым.
Завяршыўся першы дзень на навуковай ноце. Рэктар Гродзенскага дзяржаўнага ўніверсітэта імя Янкі Купалы прыняла ўдзел у секцыі «Дыялог культур і дыпламатыя ведаў: стратэгіі партнёрства ў свеце, які змяняецца» з дакладам «Стратэгічнае развіццё адукацыйнай дыпламатыі: досвед Гродзенскага дзяржаўнага ўніверсітэта імя Янкі Купалы».
Гродзенскі дзяржаўны ўніверсітэт імя Янкі Купалы