21 мая на базе ГрДУ імя Янкі Купалы адбылося ўрачыстае адкрыццё абласнога злёту блогераў «ГроднаМедыяДжэм», які аб'яднаў больш за 100 стваральнікаў сеткавага кантэнту – вопытных і пачынаючых блогераў Гродзенскага рэгіёну, а таксама прадстаўнікоў рэдакцый СМІ як вобласці, так і рэспублікі.
Ад імя рэктара Гродзенскага дзяржаўнага ўніверсітэта імя Янкі Купалы Ірыны Кітуркі з прывітальным словам звярнуўся Лявонцій Паўлаў, прарэктар па вучэбнай рабоце ГрДУ імя Янкі Купалы.
– Не выпадкова гэтае мерапрыемства праходзіць у Купалаўскім універсітэце, які з'яўляецца сапраўднай кузняй журналісцкіх кадраў. Мы імкнемся стварыць умовы для прафесійнага росту студэнтаў і падтрымліваць іх у развіцці медыйных навыкаў. Блогеры, як новыя носьбіты інфармацыі, маюць унікальную магчымасць фармаваць грамадскую думку і ўплываць на культурныя працэсы ў краіне. Гэты злёт аб'ядноўвае творчых людзей, гатовых дзяліцца сваімі ведамі і ідэямі, што вельмі важна для далейшага развіцця медыя-супольнасці ў нашым рэгіёне, – падкрэсліў Лявонцій Юр'евіч.
Гаворачы аб значнасці падзеі, намеснік начальніка галоўнага ўпраўлення ідэалагічнай работы і па справах моладзі Гродзенскага аблвыканкама Яўген Леўшык адзначыў, што ў рамках мерапрыемства чакаюцца канструктыўныя абмеркаванні, якія дапамогуць блогерам лепш зразумець сваю ролю ў інфармацыйнай прасторы.
– Блогеры і журналісты павінны працаваць разам, каб ствараць якасны кантэнт і прасоўваць праўду ў медыяпрасторы. Важна, каб кожны з вас адчуваў сваю адказнасць за інфармацыю, якую вы падаеце. Упэўнены, што гэтае мерапрыемства стане аб'яднаўчым для многіх крэатыўных рабят, – адзначыў Яўген Іванавіч.
Па задуме арганізатараў, злёт накіраваны на фармаванне рэгіянальнай супольнасці блогераў з ліку творча думаючых актыўных маладых людзей, аб'яднаных адзінай сістэмай традыцыйных беларускіх каштоўнасцяў, павагай да гісторыі краіны, пачуццём патрыятызму і адказнасці за лёс Беларусі.
Як распавяла галоўны рэдактар газеты «Гродзенская праўда» Таццяна Сяргеева, ідэя правесці першы абласны злёт блогераў была падтрымана з боку ўніверсітэта і прадстаўнікоў улады вобласці. Яна пажадала ўсім удзельнікам добра і прадуктыўна правесці час, набыць новыя знаёмствы і натхненне для творчасці.
Мерапрыемства працягнецца на базе адпачынку «Прывал», дзе ўдзельнікаў чакае дыялогавая пляцоўка з кіраўніцтвам Гродзенскай вобласці, што дасць выдатную магчымасць для свабодных зносін і абмену ідэямі.
Арганізатары злёту – Галоўнае ўпраўленне ідэалагічнай работы і па справах моладзі Гродзенскага аблвыканкама сумесна з Гродзенскім дзяржаўным універсітэтам імя Янкі Купалы, Гродзенскім абласным камітэтам ГА «БРСМ», рэдакцыяй газеты «Гродзенская праўда».
Гродзенскі дзяржаўны ўніверсітэт імя Янкі Купалы