З 26 па 28 верасня загадчык кафедры хіміі і біятэхналогіі Лізавета Узлова прыняла ўдзел у Школе для маладых вучоных «Транскрыптам у прасторы і часе: новыя падыходы да вывучэння аб'ектаў біялогіі развіцця», арганізаванай у Інстытуце біялогіі развіцця імя М.К. Кальцова РАН (Расійская Федэрацыя) пры падтрымцы Расійскага навуковага фонду.
У рамках Школы вядучымі вучонымі ў галіне біялогіі развіцця і клетачнай біялогіі былі праведзены лекцыі і майстар-класы. Праграма Школы ахоплівала разнастайныя аспекты эпітэліяльна-мезенхімных узаемадзеянняў і іх вывучэнне з дапамогай сучасных метадаў прасторавай транскрыптомікі.
У якасці мадэльных аб'ектаў былі разгледжаны культуры плюрыпатэнтных клетак, арганоіды, эмбрыёны пазваночных і бесхрыбтовых жывёл на стадыі гаструляцыі. Удзельнікі школы асвоілі аналіз дадзеных прасторавай транскрыптомікі з дапамогай праграмнага забеспячэння Visium, адпрацавалі ін'екцыі генетычных канструктаў у яйкаклеткі жывёл, пазнаёміліся з унікальным метадам гібрыдызацыі in situ - метадам HCR (гібрыдызацыйная ланцуговая рэакцыя) і метадамі канфакальнай лазернай сканавальнай мікраскапіі.
Удзел у Школе для маладых вучоных дасць магчымасць укараніць атрыманыя веды і навыкі ў навучальны працэс і навуковыя даследаванні кафедры хіміі і біятэхналогіі Гродзенскага дзяржаўнага ўніверсітэта імя Янкі Купалы.
Гродзенскі дзяржаўны ўніверсітэт імя Янкі Купалы