Рэктар Купалаўскага ўніверсітэта Ірына Кітурка прымае ўдзел у пасяджэнні Рэспубліканскага савета рэктараў устаноў вышэйшай адукацыі. Маштабная сустрэча кіраўнікоў ВНУ з усёй краіны праходзіць у Гомелі на базе Беларускага дзяржаўнага ўніверсітэта транспарту.
У пасяджэнні прымаюць удзел Міністр адукацыі Рэспублікі Беларусь Андрэй Іванец, начальнік галоўнага ўпраўлення развіцця сацыяльнай сферы Адміністрацыі Прэзідэнта Рэспублікі Беларусь Наталля Красачка.
У цэнтры ўвагі ўдзельнікаў Савета – стратэгічныя пытанні развіцця вышэйшай школы Рэспублікі Беларусь: забеспячэнне інфармацыйнай бяспекі ў адукацыйным асяроддзі, комплексная падтрымка таленавітай моладзі і выпрацоўка эфектыўных механізмаў для замацавання маладых кадраў на месцах.
Падчас пасяджэння прагучаў даклад рэктара Купалаўскага ўніверсітэта Ірыны Кітурка «Кадравы патэнцыял прафесарска-выкладчыцкага складу: падтрымка таленавітай моладзі і замацаванне кадраў». У сваім выступленні Ірына Фёдараўна падкрэсліла, што вышэйшая школа з’яўляецца інтэлектуальнай апорай суверэнітэту і незалежнасці дзяржавы, а падрыхтоўка дастойнай змены – гэта патрабаванне часу.
Як адзначыла ў дакладзе кіраўнік Купалаўскага ўніверсітэта, сёння перад сістэмай вышэйшай адукацыі востра стаіць пытанне змены пакаленняў – як узроставай, так і ментальнай. Практычна ва ўсіх установах вышэйшай адукацыі краіны назіраецца зніжэнне забяспечанасці кадрамі вышэйшай навуковай кваліфікацыі.
– Наша задача стварыць умовы для матывацыі і магчымасці для самарэалізацыі маладых выкладчыкаў, якія прыходзяць ва ўніверсітэты, у пабудове навуковай кар’еры і, у прыватнасці, абароны дысертацый, – канстатавала Ірына Кітурка.
Рэктар агучыла канкрэтныя крокі па замацаванні маладых спецыялістаў. Сярод іх – пошук і прыцягненне на працу найбольш падрыхтаваных і здольных да педагагічнай і навуковай дзейнасці, асабісты прыклад навуковага кіраўніка і акадэмічныя традыцыі. У якасці адной з прапаноў па замацаванні кадраў рэктар назвала стварэнне пастаянна дзеючай Рэспубліканскай школы маладога выкладчыка, з заняткамі пераважна ў анлайн-фармаце.
– У нас выдатная моладзь, але яна чакае ад нас не слоў, а рэальных спраў. Кадры вырашаюць усё, і тое, якія кадры будуць забяспечваць развіццё і бяспеку краіны, напрамую залежыць ад нашых сённяшніх рашэнняў, – падвяла вынік рэктар.
Нагадаем, напярэдадні кіраўнікі беларускіх ВНУ правялі рабочую нараду з Міністэрствам адукацыі на базе ГДУ імя Францыска Скарыны, дзе дэталёва разабралі пытанні інтэграцыі штучнага інтэлекту ў навучальны працэс і аўтаматызацыі кіраўнічых працэсаў.
Гродзенскі дзяржаўны ўніверсітэт імя Янкі Купалы