З 13 па 15 жніўня ў сяле Дзівеева Ніжагародскай вобласці праходзіў V З'езд малых гарадоў Гродзенскай вобласці Рэспублікі Беларусь і Ніжагародскай вобласці Расійскай Федэрацыі. Мерапрыемства, якое аб'яднала больш за 400 прадстаўнікоў двух рэгіёнаў, было прысвечана комплекснаму падыходу да вырашэння праблемы кадравага дэфіцыту ў галінах, якія развіваюць глыбінку.
У абмеркаванні галоўнай тэмы сустрэчы прынялі ўдзел больш за 300 дэлегатаў ад Ніжагародскай вобласці і звыш 100 – ад Гродзенскай. У складзе беларускай дэлегацыі прысутнічалі прадстаўнікі маладзёжнага парламента, у лік якіх увайшлі купалаўцы: студэнтка другога курса факультэта гісторыі, камунікацыі і турызму Ангеліна Халецкая, студэнтка чацвёртага курса філалагічнага факультэта Юлія Багдзевіч, выпускнікі факультэта гісторыі, камунікацыі і турызму Мікіта Акудовіч і Данііл Багуслаўскі, выпускніца педагагічнага факультэта Сямашка Наталля Антонаўна, а таксама выпускнік факультэта біялогіі і экалогіі Сяргей Яромчык.
Адразу па прыездзе госці пабывалі на экскурсіі ў Свята-Траецкім Серафіма-Дзівееўскім жаночым манастыры.
Урачыстае адкрыццё з'езда адбылося 14 жніўня. Пасля афіцыйнай часткі ўдзельнікі ўсклалі кветкі да Вечнага агню ў Парку Перамогі вёскі Дзівеева, аддаўшы даніну павагі вялікаму подзвігу продкаў. Ключавой падзеяй дня стала работа тэматычных секцый. Прадстаўнікі ГрДУ імя Янкі Купалы праявілі высокую актыўнасць у секцыі «Роля моладзі Расіі і Беларусі ў захаванні гісторыка-культурнай спадчыны і наладжванні міжпакаленчага дыялога». Эксперты і моладзь абмеркавалі практыку прыцягнення новага пакалення да захавання культурнага кода, рэгіянальнае партыйнае будаўніцтва, уклад працоўных калектываў у агульную спадчыну, дзейнасць руху «Іскра» Беларускай партыі «Белая Русь», а таксама пытанні патрыятычнага выхавання і развіцця сельскіх тэрыторый.
У ходзе выязной праграмы ўдзельнікі наведалі кам'юніці-цэнтр МАУК «Парк культуры і адпачынку ім. А.П. Гайдара», дзе далучыліся да майстар-класа па вырабе драўлянай ліштвы. Таксама дэлегаты агледзелі Васкрасенскі сабор, Музей Рускага патрыяршаства і ўсклалі кветкі да Вечнага агню ў Парку культуры і адпачынку імя А.П. Гайдара.
У дзень закрыцця з'езда адбылася выстава-кірмаш прадпрыемстваў Гродзенскай і Ніжагародскай абласцей
V З'езд малых гарадоў Гродзенскай вобласці Рэспублікі Беларусь і Ніжагародскай вобласці Расійскай Федэрацыі стаў эфектыўнай пляцоўкай для абмену вопытам і наладжвання цесных дзелавых кантактаў. Па выніках форуму быў падпісаны шэраг пагадненняў аб партнёрстве. У прыватнасці, Асацыяцыя маладзёжных саветаў Гродзенскай вобласці і Асацыяцыя маладзёжных парламентаў пры заканадаўчых органах дзяржаўнай улады Прыволжскай федэральнай акругі зацвердзілі дарожную карту. У рамках гэтага дакумента бакі плануюць сумесна рэалізоўваць кадравыя, сацыяльныя і ашчадныя ініцыятывы, фарміраваць валанцёрскія атрады і захоўваць агульную гістарычную памяць.
Гродзенскі дзяржаўны ўніверсітэт імя Янкі Купалы