Цяпер у Беларусі праходзіць рэспубліканская дабрачынная ініцыятыва «Аднаўленне святынь Беларусі». Мерапрыемства праводзіцца штогод і накіравана на выхаванне ў моладзі духоўна-маральных каштоўнасцей і павагі да помнікаў мінулага.
Акцыя праходзіць у тры этапы. Першы працягнецца да канца жніўня. У гэты час валанцёры руху «Добрае Сэрца» сумесна з рэлігійнымі арганізацыямі вызначаць культавыя аб'екты, якія патрабуюць аднаўлення, і арганізуюць працоўныя ініцыятывы. Вынікамі этапу стануць канферэнцыі, круглыя сталы і «Адкрытыя дыялогі», а таксама аблічбоўка аб'ектаў для праекта «Лічбавая зорка» з усталёўкай QR-таблічак.
Другі этап пройдзе на працягу верасня. Ён будзе ўключаць у сябе абласныя конкурсы-выставы, віртуальныя экскурсіі і дэманстрацыі відэаролікаў аб мясцовых святынях.
Фінальны этап адбудзецца 15-16 кастрычніка. Удзельнікаў чакаюць урачысты малебен ля Жыровіцкай іконы Божай Маці ў Свята-Успенскім Жыровіцкім манастыры, добраўпарадкаванне тэрыторыі манастыра, майстар-класы па іканаграфіі, выпечцы прасфор і свячэварэнні. Таксама ў праграме – канцэрт, экскурсіі і многае іншае. Самыя актыўныя ўдзельнікі будуць узгаданыя на цырымоніі ўзнагароджання.
Давайце разам захаваем духоўную спадчыну нашай краіны!
Гродзенскі дзяржаўны ўніверсітэт імя Янкі Купалы