3 ліпеня Беларусь святкуе сваё самае галоўнае дзяржаўнае свята – Дзень Незалежнасці. Гэта дзень яднання, гонару за агульныя дасягненні і магчымасці выказаць падзяку тым, хто абараніў родную зямлю, свабоду і суверэнітэт. У гэтым годзе словы любові да Радзімы гучаць з асаблівай шчырасцю, бо Незалежнасці Рэспублікі Беларусь споўнілася 35 гадоў. У гонар гэтай важнай для ўсёй краіны ўрачыстасці ў Гродне прайшла маштабная святочная праграма, актыўным удзельнікам якой стаў Гродзенскі дзяржаўны ўніверсітэт імя Янкі Купалы.
Гісторыя свята сыходзіць каранямі ў 3 ліпеня 1944 года, калі падчас аперацыі «Баграціён» была вызвалена сталіца Беларусі – горад Мінск. Жыхары сустракалі сваіх вызваліцеляў кветкамі, гучнай музыкай і словамі падзякі. Менавіта гэта дата азнаменавала пераломны момант у Вялікай Айчыннай вайне на тэрыторыі рэспублікі і пачатак поўнага ачышчэння беларускіх зямель ад прыгнёту нямецка-фашысцкіх захопнікаў.
Першапачаткова Дзень Незалежнасці ў Беларусі святкаваўся 27 ліпеня. У гэты дзень у 1990 годзе Вярхоўная рада БССР прыняла Дэкларацыю аб дзяржаўным суверэнітэце Беларускай ССР. Так і святкаваўся Дзень Незалежнасці 27 ліпеня найбліжэйшыя шэсць гадоў, пакуль рэспубліканскі рэферэндум 1996 года ўсё не змяніў. Па яго выніках было вырашана выбраць датай Дня Незалежнасці Рэспублікі Беларусь дзень вызвалення Мінска ад захопнікаў – 3 ліпеня.
Святкаванне гэтай знакавай падзеі ў Гродзенскім дзяржаўным універсітэце імя Янкі Купалы пачалося яшчэ за тыдзень. Для купалаўцаў прайшлі інтэлектуальныя гульні, віктарыны, дыялогавыя пляцоўкі, прысвечаныя гісторыі Беларусі і яе суверэнітэту. Таксама ў рамках святкавання адбыўся турнір па міні-футболе сярод дзяўчат, прагляд дакументальнага фільма «З чаго пачынаецца Радзіма», які распавядае пра гісторыю незалежнасці Беларусі і няпросты шлях станаўлення краіны пасля развалу Савецкага саюза, конкурс фатаграфій і акцыя «Спяём гімн разам», у якой купалаўцы аб'ядналі сэрцы ў агульным парыве выканання галоўнага музычнага твора сваёй краіны. Фінальным, самым яркім акордам святкавання Дня Незалежнасці для купалаўцаў стаў удзел ва ўрачыстай святочнай праграме, арганізаванай у гонар свята.
Пачалося святкаванне з цырымоніі ўскладання кветак і вянкоў да помніка савецкім воінам і партызанам, якія загінулі ў гады Вялікай Айчыннай вайны, у парку Жылібера. Разам з адміністрацыяй горада, кіраўніцтвам Гродзенскага аблвыканкама і гарвыканкама, прадстаўнікамі сілавых ведамстваў, грамадскіх арганізацый, працоўных калектываў, а таксама неабыякавымі жыхарамі і гасцямі Гродна купалаўцы на чале з рэктарам ГрДУ імя Янкі Купалы Ірынай Кітурка ўшанавалі памяць абаронцаў Айчыны хвілінай маўчання і ўсклалі букеты да мемарыяла.
Працягнулася свята ўрачыстым мітынгам «Радзіма мая дарагая!». Стройнымі радамі дэлегацыя Купалаўскага ўніверсітэта прайшла ад галоўнага корпуса на плошчу Леніна, уліўшыся ў агульны паток святкоўцаў і падзяліўшы з імі атмасферу ўрачыстасці. Выстраіўшыся ў калону, студэнты, выкладчыкі і супрацоўнікі ўніверсітэта атрымалі асалоду ад прыгажосці і маштабнасці шэсця «Траекторыя руху!». Традыцыйна ў ім прынялі ўдзел грамадскія арганізацыі і прадстаўнікі прадпрыемстваў і арганізацый горада Гродна. Замкнуў шэсце яркі аўтапарад. Рэтра-аўтамабілі і сучасныя машыны, спецыялізаваная тэхніка, а таксама тэматычныя платформы прадпрыемстваў прадэманстравалі ўсю прыгажосць і дасягненні прадпрыемстваў Гродзеншчыны.
У час урачыстага адкрыцця свята да прысутных звярнуўся старшыня Гродзенскага аблвыканкама Юрый Караеў, адзначыўшы важнасць гэтага свята для кожнага беларуса:
– Кожны год 3 ліпеня мы збіраемся на плошчах. Вакол усё тоне ў чырвона-зялёным моры нацыянальных сцягоў. Ва ўсіх на тварах усмешкі. Наша мірнае неба размалёўваюць святочныя салюты. Але давайце на хвіліну ўявім, што было б, калі б нашы дзяды і прадзеды завагаліся ў 41-м. Калі б мы не выдужалі. Адказ відавочны: не было б сённяшняга дня, не было б нас. Таму для кожнага беларуса Дзень Незалежнасці – святая дата.
Асабліва жывы водгук слова кіраўніка вобласці знайшлі ў студэнцкай моладзі, для якой Дзень Незалежнасці – магчымасць стаць часткай чагосьці большага.
– Для моладзі Дзень Незалежнасці - гэта асаблівае свята. Мы ўспрымаем яго не проста як дзень у календары, а як магчымасць з гонарам пранесці сцяг Рэспублікі Беларусь, яскрава і гучна заявіць аб сваёй краіне. Гэты дзень для нас – сімвал таго, што мы можам працаваць на карысць роднага краю, ажыццяўляць свае ідэі і рэалізоўваць самыя смелыя амбіцыі. Бо пад мірным небам у квітнеючай краіне рабіць гэта значна больш прыемна і ганарова, – падзялілася студэнтка трэцяга курса факультэта гісторыі, камунікацыі і турызму Карына Місцюк.
Душэўнай часткай свята для купалаўцаў стала панарама арт-пляцовак «Шчаслівая жанчына – сіла краіны», у рамках якой Гродзенскі дзяржаўны ўніверсітэт імя Янкі Купалы падрыхтаваў тэматычную пляцоўку «Жаночы поспех». Прымеркаваная не толькі да святкавання Дня Незалежнасці Рэспублікі Беларусь, але і да Года беларускай жанчыны, гэтае ўнікальнае месца сабрала 24 паспяховых прадстаўніц гродзенскіх прадпрыемстваў, грамадскіх аб'яднанняў, а таксама дэпутатаў Гродзенскага гарадскога Савета дэпутатаў. Усе яны былі гатовы падзяліцца з прысутнымі гісторыямі свайго трыўмфу, натхніць асабістым прыкладам і пакінуць аўтографы. Сярод гасцей пляцоўкі нашага ўніверсітэта былі намеснік генеральнага дырэктара Гродзенскага РУП «Фармацыя», дэпутат Гродзенскага гарадскога Савета дэпутатаў Таццяна Зарэцкая; галоўны ўрач установы аховы здароўя «Гродзенская абласная інфекцыйная клінічная бальніца», дэпутат Гродзенскага гарадскога Савета дэпутатаў Наталля Малышка; старшыня Гродзенскай абласной арганізацыі Беларускага Чырвонага Крыжа Наталля Мельнічук; старшыня Ленінскай раённай арганізацыі г. Гродна РГА «Белая Русь» Алена Сапоцька; галоўны ўрач Гродзенскага абласнога клінічнага скурна-венералагічнага дыспансера Кацярына Сергіенка і дырэктар УА «Гродзенскі дзяржаўны каледж тэхнікі, тэхналогій і дызайну», дэпутат Гродзенскага гарадскога Савета дэпутатаў Святлана Шока; старшыня Гродзенскай абласной арганізацыі грамадскага аб'яднання «Беларускі саюз жанчын» Ірына Сцепаненка і дэпутат Палаты прадстаўнікоў Нацыянальнага сходу, намеснік старшыні Пастаяннай камісіі па дзяржаўным будаўніцтве, мясцовым самакіраванні і рэгламенце Алена Патапава; галоўны ўрач дзяржаўнай установы аховы здароўя «Гарадская клінічная паліклініка № 6 г. Гродна» Наталля Ягорчанка; галоўны ўрач ДВЗ «Гарадская паліклініка № 4 г. Гродна» Ларыса Кучук; старшыня праўлення Гродзенскай гарадской арганізацыі «Гродзенчанка» ГА «БСЖ» Ірына Луканская; старшыня праўлення Ленінскага раённага аддзялення Беларускі дзіцячы фонд Аксана Тарасевіч; старшыня камісіі па рабоце з моладдзю і патрыятычнаму выхаванню моладзі Гродзенскай гарадской рады ветэранаў Ларыса Хацько; старшыня Ленінскай раённай арганізацыі г. Гродна ГА «Беларускі фонд міру» Ірына Раўлушэвіч. Кожная з гэтых паспяховых жанчын – яскравы прыклад лідэрства, мэтанакіраванасці, самааддачы, адданасці, а таксама дабрыні, павагі, узаемнай падтрымкі і бязмежнай любові да сваёй справы і Радзімы.
Яшчэ да афіцыйнага адкрыцця пляцоўкі каля яе пачалі збірацца работнікі і студэнты Купалаўскага ўніверсітэта. Кожны з іх з нецярпеннем чакаў сваю гераіню, якая сваім прыкладам натхняе на новыя здзяйсненні.
– У сучасным свеце вельмі важна раўняцца на людзей, якія сваімі дасягненнямі і вынікамі паказваюць, што ты таксама можаш гэтага дабіцца. Сёння мне хацелася б сустрэцца з кіраўніком адміністрацыі Кастрычніцкага раёна Зояй Куляшой. Мне блізкія яе мэтанакіраванасць і прафесіяналізм, з якімі яна падыходзіць да сваёй справы, – расказаў студэнт першага курса факультэта біялогіі і экалогіі Аляксей Струнеўскі.
– Мне вельмі адгукаецца канцэпцыя Года беларускай жанчыны, і я рада, што нашых суайчынніц вырашылі падтрымаць такім чынам, – прызналася студэнтка першага курса факультэта біялогіі і экалогіі Марыя Мітраховіч. – Я прыйшла ўзяць аўтограф у генеральнага дырэктара нашага гродзенскага прадпрыемства – «Малочны свет» Марыі Анікеевы. Для мяне яна – прыклад ідэальнага лідэра, які робіць усё для таго, каб яе прадпрыемства квітнела, станавілася лепш і вырабляла яшчэ больш якасную прадукцыю.
– Я прыйшоў сустрэцца і ўзяць аўтограф у галоўнага ўрача Гродзенскай абласной інфекцыйнай клінічнай бальніцы Наталлі Генрыхаўны Малышка, – падзяліўся студэнт першага курса факультэта біялогіі і экалогіі Багдан Брыш. – Урач – гэта вельмі адказная прафесія, якая патрабуе вялікай колькасці ведаў і ўпэўненасці ва ўласных сілах, а пасада галоўнага ўрача патрабуе прыкладаць яшчэ больш намаганняў. Займаць такую важную пасаду – значыць быць мэтанакіраваным, валодаць лідэрскімі якасцямі, гатоўнасцю браць на сябе адказнасць і ўмець правільна наладзіць працу ў бальніцы. Я вельмі захапляюся Наталляй Генрыхаўнай за яе ўпартасць, імкненне да поспеху і самааддачу.
Апроч сустрэч з паспяховымі госцямі, арганізатары лакацыі падрыхтавалі мноства займальных мерапрыемстваў, прысвечаных гісторыі Рэспублікі Беларусь і яе выбітным асобам. У рамках грамадзянска-патрыятычнага праекта «Жывая гісторыя» прайшла віктарына пра беларускую культуру і знакамітых жанчын краіны, а ўсе жадаючыя змаглі сфатаграфавацца з гістарычнымі персанажамі мінулых эпох. Для самых маленькіх удзельнікаў Купалаўскі ўніверсітэт арганізаваў развіваючыя гульні і творчы майстар-клас па стварэнні галоўнага прыроднага сімвала Беларусі – васілька з паперы. Акрамя таго, сумесна з Гродзенскім дзяржаўным медыцынскім універсітэтам былі арганізаваны паказ традыцыйных беларускіх убораў і канцэртныя нумары.
Кульмінацыяй святкавання Дня Незалежнасці Рэспублікі Беларусь стане рэспубліканская акцыя «Спяём гімн разам». У 22:55 уся краіна аб'яднаецца, каб у адзін голас выканаць галоўны музычны твор дзяржавы і яскрава завяршыць гэты юбілейны дзень.
Для купалаўцаў Дзень Незалежнасці Рэспублікі Беларусь стаў не проста датай у календары, а сапраўдным святам яднання. Гэта дзень гонару за сваю радзіму, за продкаў, якія абаранілі волю, і за суайчыннікаў, якія штодня сваёй упартай працай і поспехамі ўслаўляюць краіну, падаючы годны прыклад маладому пакаленню.
Гродзенскі дзяржаўны ўніверсітэт імя Янкі Купалы