З 26 па 29 мая Гродзенскі дзяржаўны ўніверсітэт імя Янкі Купалы прымае ўдзел у XXXI Міжнароднай спецыялізаванай выставе «ТІБО-2026» і Форуме высокіх тэхналогій і лічбавай інфраструктуры HTDI, якія праходзяць у Мінску. Ключавой тэмай форуму ў гэтым годзе з'яўляецца «Штучны інтэлект – драйвер тэхналагічнага развіцця».
Праграма мерапрыемства ўключае каля 20 тэматычных секцый, прысвечаных цыфравізацыі прамысловасці, штучнаму інтэлекту ў навуцы і адукацыі, вялікім даным, беспілотным сістэмам і іншым актуальным напрамкам. Усяго свае распрацоўкі прапануюць 70 кампаній IT-сектара з Беларусі і Расіі. Таксама сярод удзельнікаў свае інавацыйныя ідэі прадстаўляе Купалаўскі ўніверсітэт.
На калектыўнай экспазіцыі Міністэрства адукацыі Рэспублікі Беларусь фізіка-тэхнічны факультэт і факультэт матэматыкі і інфарматыкі ГрДУ імя Янкі Купалы прадстаўляюць распрацоўкі ў розных сферах - ад навучальнага комплексу прамысловай аўтаматызацыі да медыцынскіх дыягнастычных сістэм на базе штучнага інтэлекту і лічбавых прафарыентацыйных рашэнняў.
У дэлегацыю Купалаўскага ўніверсітэта ад фізіка-тэхнічнага факультэта ўвайшлі загадчык кафедры электратэхнікі і электронікі Андрэй Герман, старшы выкладчык кафедры электратэхнікі і электронікі Андрэй Самародаў, а таксама студэнты трэцяга курса Міхаіл Буклага і Уладзімір Арэхва. На форуме фізікі-купалаўцы дэманструюць Лабараторны комплекс "Сістэмы прамысловай аўтаматызацыі на аснове ПЛК". Ён прызначаны для навучання студэнтаў прынцыпам пабудовы, эксплуатацыі і абслугоўвання сістэм прамысловай аўтаматызацыі. Унікальнасць комплексу ў тым, што аналагі ў Беларусі не вырабляюцца, а яго кошт больш як у два разы ніжэйшы за расійскія аналагі. Камплектуючыя выраблены ў краінах СНД, што пацвярджае імпартазамяшчальны характар распрацоўкі.
Ад факультэта матэматыкі і інфарматыкі на форуме прысутнічаюць загадчык кафедры сучасных тэхналогій праграмавання Ганна Карканіца і студэнт трэцяга курса Анастасія Саковіч. Яны прэзентуюць тры медыцынскія ШІ-сістэмы: для дыягностыкі інсульту («НейраСкан»), раку малочнай залозы («МамаАналіз») і гемангіёмы печані («ГепатоСкрын»), распрацаваныя пад кіраўніцтвам загадчыка кафедры сістэмнага праграмавання і камп'ютарнай бяспекі Аляксандра Кадана ў рамках дзейнасці СНДЛ «Інтэлект-Бяспека» сумесна з Гродзенскай універсітэцкай клінікай. Таксама матэматыкі Купалаўскага ўніверсітэта прадэманструюць лічбавыя прафарыентацыйныя рашэнні з элементамі дапоўненай рэальнасці і гейміфікацыі (AR-мадэлі, робат УНІКУМ, 2D-гульня «Робат УНІКУМ ідзе ў IT»), распрацаваныя пад кіраўніцтвам дацэнта кафедры фундаментальнай і прыкладной матэматыкі Наталлі Семянчук. У заключны дзень форуму да прысутных далучацца студэнты другога курса факультэта матэматыкі і інфарматыкі Руслан Кішкуноў і Ігар Такшэеў.
Усе інавацыйныя распрацоўкі, якія прадстаўляюцца Гродзенскім дзяржаўным універсітэтам імя Янкі Купалы, будуць прадэманстраваны ўпершыню або цяпер знаходзяцца ў высокай ступені гатоўнасці да ўкаранення і імпартазамяшчэння.
Гродзенскі дзяржаўны ўніверсітэт імя Янкі Купалы