Адзін з самых адказных этапаў уступнай кампаніі - рэгістрацыя абітурыентаў на цэнтралізаванае тэсціраванне - стартаваў сёння, 9 красавіка, і прадоўжыцца да 22 красавіка.
У Гродзенскай вобласці працуюць 4 пункты рэгістрацыі: Гродзенскі дзяржаўны ўніверсітэт імя Янкі Купалы, Гродзенскі дзяржаўны аграрны ўніверсітэт, Ваўкавыскі каледж і Лідскі каледж УА "Гродзенскі дзяржаўны ўніверсітэт імя Янкі Купалы".
Пункты рэгістрацыі працуюць штодня з 9.00 да 19.00 у буднія дні, у суботы - 11 і 18 красавіка - з 9.00 да 18.00 і 20 красавіка - з 9.00 да 18.00.
Як расказала начальнік аддзела тэсціравання і прафесійнай арыентацыі моладзі Цэнтра даўніверсітэцкай адукацыі Гродзенскага дзяржаўнага ўніверсітэта імя Янкі Купалы Наталля Кранцэвіч, для таго, каб зарэгістравацца, абітурыент можа выбраць адзін з двух спосабаў. Першы - прайсці першапачатковую рэгістрацыю на сайце Рэспубліканскага інстытута кантролю ведаў, аплаціць і прыехаць у пункт рэгістрацыі для атрымання пропуску. Рэгістрацыя лічыцца завершанай толькі пасля атрымання арыгінала пропуску для ўдзелу ў цэнтралізаваным тэсціраванні. Другі спосаб рэгістрацыі - адразу прыехаць у пункт рэгістрацыі, зарэгістравацца, аплаціць і атрымаць пропуск.
Цэнтралізаваны іспыт і цэнтралізаванае тэсціраванне будуць праходзіць у адзіныя тэрміны для выпускнікоў 2026 года, выпускнікоў мінулых гадоў і выпускнікоў каледжаў. 26 мая адбудзецца цэнтралізаваны іспыт па прадмеце на выбар для 11-класнікаў і цэнтралізаванае тэсціраванне па прадмеце на выбар для выпускнікоў мінулых гадоў і выпускнікоў каледжаў. Цэнтралізаваны экзамен па беларускай або рускай мове для 11-класнікаў і цэнтралізаванае тэсціраванне па беларускай або рускай мове для выпускнікоў мінулых гадоў і выпускнікоў каледжаў пройдуць 29 мая. Таксама 2 і 5 чэрвеня адбудзецца цэнтралізаванае тэсціраванне па прадмеце на выбар для ўсіх абітурыентаў. Рэзервовымі днямі для цэнтралізаванага тэсціравання вызначаны 18, 20, 22 чэрвеня. Рэзервовыя дні для цэнтралізаванага іспыту - 20, 22 чэрвеня, іншыя тэрміны - 17, 19 жніўня.
Пры рэгістрацыі абітурыент павінен мець пры сабе дакумент (копію дакумента), які пацвярджае асобу (пашпарт, ID-карту, пасведчанне на права жыхарства, пасведчанне бежанца або даведку, што выдаецца ў выпадку страты дакумента, які пацвярджае асобу). Для льготных катэгорый грамадзян (дзеці са шматдзетных сем'яў, дзеці-інваліды, дзеці-сіроты) прадугледжана бясплатная рэгістрацыя.
Наш карэспандэнт паразмаўляў з хлопцамі, якія сёння прыйшлі ў ГрДУ імя Янкі Купалы, каб зарэгістравацца на цэнтралізаванае тэсціраванне.
– Цэнтралізаваны іспыт буду здаваць па двух прадметах: руская мова і гісторыя Беларусі ў кантэксце сусветнай гісторыі, а цэнтралізаванае тэсціраванне па англійскай мове. Планую паступаць у Гродзенскі дзяржаўны ўніверсітэт імя Янкі Купалы на спецыяльнасць "Рамана-германская філалогія", – адзначыў навучэнец 11 класа Гімназіі №7 імя У.Ц. Калакольнікава г. Гродна Міраслаў Багдзевіч.
- Буду здаваць матэматыку, рускую і англійскую мову. Рашэнне паступаць на спецыяльнасць "Менеджмент" у Купалаўскі ўніверсітэт прыняла яшчэ ў дзесятым класе, таму да выпрабаванняў рыхтуюся вельмі старанна, - распавяла навучэнка сярэдняй школы № 31 імя Л.Г. Кляцкова г. Гродна Паліна Чарнецкая.
Нагадваем, Купалаўскі ўніверсітэт традыцыйна выступіць УВА-каардынатарам правядзення цэнтралізаванага тэсціравання на тэрыторыі Гродзенскай вобласці. Для правядзення цэнтралізаванага тэсціравання на базе ГрДУ імя Янкі Купалы будуць задзейнічаны 7 карпусоў па адрасе: вул. Ажэшкі, 22; вул. Леніна, 32; вул. Захарава, 32; зав. Даватара, 3 /1; вул. Гаспадарчая, 23; вул. Горкага, 84; вул. Кастрычніцкая, 5.
Гродзенскі дзяржаўны ўніверсітэт імя Янкі Купалы