Традыцыйна кожны год народы Усходу адзначаюць свята прыходу вясны і пачатак новага жыццёвага цыкла – Наўруз. Сёння, 27 сакавіка, Гродзенскі дзяржаўны ўніверсітэт імя Янкі Купалы таксама далучыўся да святкавання гэтага «цёплага» свята, правёўшы IX Адкрыты фестываль «Наўруз Байрам».
Святкаванне пачалося з самай раніцы. На першым паверсе галоўнага корпуса прайшла інтэрактыўная пляцоўка «Усходні кірмашык». Студэнты-іншаземцы падрыхтавалі для ўсіх жадаючых мудрасці Усходу, нацыянальныя пачастункі, а таксама прэзентацыю «Наўруз розных гадоў», у рамках якой расказалі гісторыю фестывалю.
Затым удзельнікаў чакала выстава-кірмаш «Калейдаскоп творчасці». Пасля яркіх прывітальных творчых нумароў да ўсіх прысутных звярнулася рэктар Купалаўскага ўніверсітэта Ірына Кітурка.
– Дзевяты раз мы праводзім гэтае свята, і вельмі рады і дзякуем вам за тое, што вы прыўносіце свае сямейныя традыцыі ў нашу краіну. І мы сапраўды кажам, што вельмі жадаем, каб, калі вы паедзеце, вы ў сваім сэрцы павезлі кавалачак Беларусі. А дзякуючы вам кавалачак вашых краін назаўжды застанецца з намі і ў нашым універсітэце, – адзначыла Ірына Фёдараўна.
Пасля прывітальных слоў купалаўцы тут жа акунуліся ў атмасферу свята. Удзельнікі атрымалі магчымасць пакаштаваць нацыянальныя стравы Туркменістана, Азербайджана і Узбекістана – традыцыйны плоў з мясам, долму, пахлаву, самсу, манты, чак-чак, выпечку, а таксама традыцыйную кітайскую лапшу, шанцы і блінцы з мёдам.
Потым студэнты з Туркменістана прадэманстравалі ўсім прысутным свой нацыянальны танец «Білезік».
Яркай часткай кірмаша стала выстава касцюмаў Туркменістана і прэзентацыя вясельнай традыцыі краіны. Праз яркія тканіны і традыцыйныя вышыўкі замежныя студэнты яшчэ больш акунулі ўдзельнікаў свята ў сваю культуру і пазнаёмілі з галоўнымі абрадамі і рытуаламі традыцыйнага шлюбу і нават наглядна прадэманстравалі іх.
Прадэгуставаўшы найсмачныя замежныя пачастункі і вывучыўшы культуру, гасцей свята чакаў танцавальны флэшмоб. У галерэі «Universum» кожны жадаючы змог аддацца палымяным рытмам музыкі і станцаваць туркменскія і ўзбекскія танцы.
Кульмінацыяй свята стаў маштабны канцэрт. Ізноў звярнуўшыся да ўдзельнікаў свята, Ірына Фёдараўна зрабіла акцэнт на тым, што Наўруз па-сапраўднаму аб'яднаў сэрцы купалаўцаў.
– Я так рада і так ганаруся, што ў нашым універсітэце шмат замежных студэнтаў, і ваша культура ўзбагачае нас. Ваша магчымасць вучыцца ў нашай краіне, а наша магчымасць дакрануцца да вашых традыцый, да вашага свята – гэта такое ўзаемнае ўзбагачэнне, якое за грошы не купіш. Гэта можа быць толькі калі ўсё гэта ад душы, – адзначыла Ірына Фёдараўна.
Таксама рэктар ГрДУ імя Янкі Купалы Ірына Кітурка пажадала ўсім прысутным прыемнага канцэрта і яшчэ раз упэўніцца, што студэнты ў Купалаўскім універсітэце выяўляюць, раскрываюць і рэалізуюць свой патэнцыял. Канцэрт зарадзіў усіх прысутных незабыўнымі эмоцыямі. Нацыянальныя танцы, песні і палымяныя сучасныя нумары распалілі сэрцы гледачоў, напоўніўшы іх духам святочнага адзінства.
Наўруз Байрам у Купалаўскім універсітэце ў чарговы раз стаў святам яднання не толькі народаў Усходу, але і ўсіх прадстаўнікоў іншых краін, якія вучацца ў ГрДУ імя Янкі Купалы, паказаўшы, што ў нашай Alma mater дружба народаў не ведае межаў.
Гродзенскі дзяржаўны ўніверсітэт імя Янкі Купалы