Сёння, 18 снежня, у Гродзенскім дзяржаўным універсітэце імя Янкі Купалы прайшла маштабная дыялогавая пляцоўка, якая сабрала студэнтаў з усіх факультэтаў. Цэнтральныя тэмы сустрэчы – «Інфармацыйная бяспека: правілы паводзін у сетцы Інтэрнэт» і «Процідзеянне карупцыі: меры адказнасці за карупцыйныя правапарушэнні». Арганізатарам мерапрыемства выступіла сацыяльна-педагагічная і псіхалагічная служба ўпраўлення па ідэалагічнай і выхаваўчай рабоце ГрДУ імя Янкі Купалы.
Па тэме кібербяспекі перад удзельнікамі выступіў начальнік аддзялення па супрацьдзеянні кіберзлачыннасці Ленінскага аддзела ўнутраных спраў горада Гродна, падпалкоўнік міліцыі Антон Стральчонак. У сваім дакладзе ён асвятліў найбольш распаўсюджаныя віды кіберпагроз, а таксама падзяліўся правіламі бяспечных паводзін у сацыяльных сетках і месэнджарах. Асаблівая ўвага была ўдзелена эфектыўным мерам прафілактыкі махлярства і анлайн-агрэсіі.
Тэму карупцыйных правапарушэнняў асвятліў старшы оперупаўнаважаны АУС Адміністрацыі Ленінскага раёна горада Гродна Аляксей Блязнюк. Ён падрабязна растлумачыў прысутным, якія дзеянні кваліфікуюцца як карупцыйныя правапарушэнні і якая адказнасць за іх прадугледжана заканадаўствам Рэспублікі Беларусь. Таксама Аляксей Блязнюк расказаў, як кожны чалавек можа садзейнічаць фарміраванню сумленнага і некарупцыйнага асяроддзя ў вучобе, на рабоце і ў паўсядзённым жыцці.
Мерапрыемства прайшло ў фармаце актыўнага дыялогу. Удзельнікі не толькі ўважліва слухалі, але і дзяліліся асабістым вопытам, задавалі пытанні і прапаноўвалі свае ідэі па павышэнні прававой і лічбавай пісьменнасці.
Правядзенне падобных мерапрыемстваў пацвярджае, што Купалаўскі ўніверсітэт адказна падыходзіць да развіцця ў сваіх студэнтаў не толькі прафесійных кампетэнцый, але і ведаў, якія дапамогуць ім стаць сумленнымі, тэхналагічна пісьменнымі людзьмі.
Гродзенскі дзяржаўны ўніверсітэт імя Янкі Купалы