Дэкан фізіка-тэхнічнага факультэта Гродзенскага дзяржаўнага ўніверсітэта імя Янкі Купалы Генадзь Гачко адзначае знакавую вяху ў сваім жыцці – 50-годдзе прафесійнай дзейнасці на карысць Купалаўскага ўніверсітэта.
Свой кар'ерны шлях ва ўніверсітэце Генадзь Аляксеевіч пачаў 11 лістапада 1975 года, адразу пасля службы ў радах Савецкай Арміі. Быў прыняты ў навукова-даследчы сектар Гродзенскага дзяржаўнага педагагічнага інстытута імя Янкі Купалы, дзе працаваў на розных пасадах – ад інжынера да старшага навуковага супрацоўніка. У 1982 годзе пасля паспяховай абароны дысертацыі Генадзь Гачко перайшоў у штат кафедры агульнай фізікі на пасаду старшага выкладчыка. Пасля працаваў дацэнтам і загадчыкам кафедры агульнай і тэарэтычнай фізікі. У 1994 годзе Генадзь Аляксеевіч быў назначаны на пасаду дэкана толькі што створанага фізіка-тэхнічнага факультэта. Акрамя таго, працаваў дырэктарам Інстытута паслядыпломнай адукацыі, а пасля рэарганізацыі інстытута – дэканам факультэта бесперапыннай адукацыі. У 2017 годзе быў прызначаны прарэктарам па вучэбнай рабоце, а ў 2021 годзе вярнуўся на свой факультэт.
Акрамя акадэмічнай і навуковай работы, Генадзь Аляксеевіч актыўна садзейнічае ўмацаванню матэрыяльна-тэхнічнай базы ВНУ. Пры яго непасрэдным удзеле Купалаўскі ўніверсітэт пашырыў сваю інфраструктуру, што выявілася ў стварэнні Навукова-тэхналагічнага парку і ўзвядзенні сучаснага корпуса фізіка-тэхнічнага факультэта.
Для Генадзя Гачко Купалаўскі ўніверсітэт стаў сапраўдным домам, які сагравае яго на працягу 50 гадоў. ГрДУ імя Янкі Купалы -альма-матэр сям'і Гачко: яго скончыў не толькі Генадзь Аляксеевіч, а яшчэ яго бацька, брат і сястра, а таксама жонка, сын і дачка, зяць і нявестка і нават унучка.
Гродзенскі дзяржаўны ўніверсітэт імя Янкі Купалы віншуе Генадзя Гачко са знамянальнай датай – 50-годдзем прафесійнага шляху, а таксама выказвае глыбокую ўдзячнасць за шматгадовую, плённую і самаадданую працу. Ад імя ўсяго калектыву жадаем Генадзю Аляксеевічу моцнага здароўя, невычэрпнай энергіі і новых прафесійных поспехаў!
Гродзенскі дзяржаўны ўніверсітэт імя Янкі Купалы