19 верасня Гродзенскі дзяржаўны ўніверсітэт імя Янкі Купалы з афіцыйным візітам наведала дырэктар прадстаўніцтва МТРК «Мір» у Беларусі, старшыня Беларускага саюза жанчын Вольга Шпілеўская. Дыялогавая пляцоўка са студэнтамі і прафесарска-выкладчыцкім складам Купалаўскага ўніверсітэта на тэму «У адзінстве народа – будучыня Беларусі» была праведзена ў рамках святочных мерапрыемстваў да Дня народнага адзінства.
На сустрэчы прысутнічала больш за 150 купалаўцаў. Адкрыла мерапрыемства рэктар ГрДУ імя Янкі Купалы, дэлегат сёмага Усебеларускага народнага сходу Ірына Кітурка. Прадстаўляючы госцю, Ірына Фёдараўна адзначыла, што Вольга Аляксандраўна - дзіўны чалавек, у якога хобі супадае з працай. Таксама рэктар падкрэсліла, што падчас размовы будуць абмяркоўвацца ўсе пытанні, якія хвалююць моладзь, забароненых тэм для размовы няма.
На пачатку свайго выступлення Вольга Шпілеўская акцэнтавала ўвагу на шчырасці і сумленнасці беларускага народа, заклікаўшы ўдзельнікаў сустрэчы да адкрытага і актыўнага дыялога. Госця расказала пра Беларускі саюз жанчын і пра перспектывы для маладога пакалення, якія адкрывае арганізацыя.
– Маладыя дзяўчыны, за вамі будучыня. І нам, як Беларускаму саюзу жанчын, вельмі важна перадаць вам усё самае лепшае, а па-другое, заўважыць вас, дапамагчы вам стаць тымі, хто прыйдзе да нас на змену ва ўсіх галінах. Вашы ідэі і наш досвед павінны прывесці нас да таго, што будзе актыўна развіваць нашу краіну ў будучыні. Наша задача знайсці гэты сплаў маладосці і мудрасці, і зрабіць так, каб ён быў максімальна эфектыўным, – падкрэсліла Вольга Шпілеўская.
Спікер падзялілася гісторыяй развіцця тэлеканала «Мір», расказала аб напрамках і прынцыпах яго працы. Вольга Аляксандраўна адзначыла, што тэлеканал «Мір» – гэта адзіная прастора, дзе адлюстроўваецца жыццё постсавецкіх краін.
Вяртаючыся да асноўнай тэмы дыялогу «У адзінстве народа – будучыня Беларусі» Вольга Шпілеўская прапанавала паглядзець удзельнікам сустрэчы дакументальны фільм, створаны журналістам МТРК «Мір», аб падзеях уз'яднання Заходняй Беларусі з тэрыторыяй БССР. Тут адлюстравалі храналогію падзей, якія папярэднічалі гэтай памятнай даце, з дапамогай архіўных матэрыялаў, інтэрв'ю сваякоў тых, хто жыў у той нялёгкі для Заходняй Беларусі час, і навуковых работнікаў. Варта адзначыць, што ў здымках фільма прыняў удзел і дацэнт кафедры гісторыі Беларусі, археалогіі і спецыяльных гістарычных дысцыплін Аляксандр Горны.
– Гісторыя ўз'яднання Ўсходняй і Заходняй Беларусі – гэта гісторыя таго, як мы як адзіны народ сфармаваліся. Яна важная для кожнага. І вельмі хочацца, каб маладое пакаленне гэтаму святу таксама ўдзяляла асаблівую ўвагу і разумела, наколькі гэта важна. Таму што Вялікая Айчынная вайна крыху «зацерла» значнасць гэтага свята. І гэта зразумела, таму што вялікая катастрофа, якую мы перажылі, як ваявалі і абаранялі нашу Радзіму – гэта адно. Але зараз трэба вярнуць і гісторыю гэтага свята і данесці яго значнасць падрастаючаму пакаленню, – адзначыла Вольга Аляксандраўна.
У ходзе адкрытага дыялога адбылося абмеркаванне дакументальнага фільма. Удзельнікі сустрэчы адзначылі высокую якасць падрыхтоўкі фільма і не стрымлівалі сваіх эмоцый. Пасля Вольга Шпілеўская адказала на ўсе пытанні, якія цікавілі студэнтаў-купалаўцаў. Пытанні датычыліся ўкаранення штучнага інтэлекту ў работу журналіста, пераўтварэннях у сферы журналістыкі, перавагах журналісцкай адукацыі. Таксама ўдзельнікі сустрэчы цікавіліся перспектывамі супрацоўніцтва Беларускага саюза жанчын з такімі арганізацыямі ў іншых краінах, значнасцю ролі жанчыны ў грамадстве, а таксама аб грамадскіх ініцыятывах арганізацыі, якія адлюстроўваюцца ў тэлевізійных праектах МТРК «Мір». Цікавіліся купалаўцы і сакрэтам поспеху госці.
– Для мяне магчымасць пагутарыць з Вольгай Аляксандраўнай – гэта шанец даведацца ў дасведчанага чалавека аб магчымасцях журналіста і яго асабістых якасцях. Для мяне даведацца, як, чаму і што лепш мець зараз журналісту – было асноўнай задачай. Вольга Аляксандраўна падзялілася сваім вопытам, расказала гісторыю свайго станаўлення як журналіста, што стала для мяне вялікім штуршком рухацца да пастаўленай мэты і развіваць свае здольнасці, – падзялілася студэнтка 2 курса факультэта гісторыі, камунікацыі і турызму Арыяна Ланіна.
Напрыканцы сустрэчы госці ўручылі кветкі і памятны падарунак ад моладзі Гродзенскага дзяржаўнага ўніверсітэта імя Янкі Купалы. У сваю чаргу Вольга Аляксандраўна пажадала купалаўцам свету, цяпла і ўсмешак, а самае галоўнае – заўсёды заставацца вернымі самому сабе.
Візіт Вольгі Шпілеўскай у Купалаўскі ўніверсітэт прадоўжыўся наведваннем Гуманітарнага каледжа ГрДУ імя Янкі Купалы, дзе выкладчыкі правялі аглядную экскурсію, прадэманстраваўшы дасягненні і ініцыятывы навучэнцаў. Таксама адбылася сустрэча жаночага актыву з Вольгай Аляксандраўнай, у рамках якой былі абмеркаваны пытанні, якія датычацца ролі жанчын у грамадстве і магчымых шляхоў іх актыўнага ўдзелу ў жыцці каледжа і горада.
Гродзенскі дзяржаўны ўніверсітэт імя Янкі Купалы