Сустрэча адбылася 3 верасня і аб'яднала кіраўніцтва ўніверсітэта, выкладчыкаў і студэнтаў факультэта матэматыкі і інфарматыкі.
Народны настаўнік Беларусі Альфрэд Ладыка з'яўляецца выпускніком-купалаўцам факультэта матэматыкі і інфарматыкі. Сёння ён працуе настаўнікам матэматыкі гімназіі № 1 г. Ліда.
У час свайго выступлення перад аўдыторыяй Альфрэд Антонавіч падзяліўся прафесійным вопытам, расказаў аб любові да вырашэння матэматычных задач, вялікім жаданні працаваць і выхоўваць новае пакаленне матэматыкаў.
– Настаўнікам матэматыкі працую 47 гадоў. Пачаў педагагічны шлях у Іўі, працягнуў у Лідзе, дзе жыву і працую дагэтуль. Кожны год у школе прыносіць нешта новае, але застаецца галоўнае – любіць дзяцей і свой прадмет. Быць у форме для настаўніка - значыць падаваць вучням веды так, каб ім было цікава і зразумела. Тады і можна іх захапіць, а значыць, навучыць, – адзначыў Альфрэд Ладыка.
Удзельнікі сустрэчы мелі ўнікальную магчымасць задаць пытанні госцю і атрымаць каштоўныя парады па педагогіцы і выхаванні. Сярод пытанняў: сакрэт поспеху, чаму менавіта прафесія настаўніка, як працаваць з алімпіядным рухам і многае іншае. Студэнты папрасілі госця даць парады будучым настаўнікам матэматыкі. Альфрэд Антановіч падзяліўся са студэнтамі тым, як стаць сапраўдным настаўнікам:
– Каб стаць сапраўдным настаўнікам, трэба ўвесь час удасканальвацца, вырашаць алімпіядныя задачы. Таксама важна асвоіць методыку выкладання матэматыкі і рэгулярна вяртацца да тэстаў па матэматыцы. Толькі стараннасць і жаданне працаваць зможа прывесці кожнага да запаветнай мэты.
Ганаровае званне «Народны настаўнік Беларусі» Альфрэду Антановічу прысвоілі за выдатныя дасягненні ў галіне адукацыі, шматгадовую добрасумленную працу і значны ўклад у выхаванне падрастаючага пакалення.
Альфрэд Антановіч – адзін з двух педагогаў краіны, якія носяць ганаровае званне «Народны настаўнік Беларусі». Найвышэйшую адзнаку сваёй амаль паўвекавой працы на школьнай ніве ён атрымаў якраз напярэдадні новага навучальнага года.
Гродзенскі дзяржаўны ўніверсітэт імя Янкі Купалы