16 чэрвеня ў Купалаўскім універсітэце прайшоў справаздачна-выбарчы сход Савета маладых вучоных. У мерапрыемстве прынялі ўдзел рэктар Ірына Кітурка, прарэктар па навуковай рабоце Наталля Башун і маладыя вучоныя ГрДУ імя Янкі Купалы. У ходзе сустрэчы разглядаліся вынікі дзейнасці Савета маладых вучоных за перыяд 2022–2025 гадоў, зацвярджэнне новага складу Савета, а таксама задачы і напрамкі работы на перыяд 2025–2028 гадоў.
Адкрыла сход рэктар ГрДУ імя Янкі Купалы Ірына Кітурка. Яна падзякавала ўдзельнікам за запрашэнне, адзначыўшы значнасць Савета маладых вучоных у развіцці навуковай дзейнасці ўніверсітэта.
– Я рада сустрэчы з вамі і заўсёды адкрыта да дыялогу, гатова адказаць на ўсе пытанні і дапамагчы ў рэалізацыі вашых ідэй.
На сходзе было разгледжана пытанне аб выніках дзейнасці Савета.
– На працягу трох гадоў мы выступалі арганізатарамі і ўдзельнікамі мноства навуковых мерапрыемстваў, падтрымлівалі маладых даследчыкаў і садзейнічалі развіццю міждысцыплінарных праектаў, – адзначыў Аляксандр Горны.
Адным з ключавых момантаў сходу стала зацвярджэнне новага складу Савета маладых вучоных. Прарэктар па навуковай рабоце Наталля Башун абвясціла новы склад Савета, пасля чаго быў выбраны старшыня Савета маладых вучоных, а таксама яго намеснік і сакратар.
– Новы склад Савета будзе працаваць над новымі ініцыятывамі і праектамі, якія дапамогуць развіваць навуковую дзейнасць нашага ўніверсітэта.
Далей абмяркоўваліся задачы і перспектывы працы Савета на перыяд 2025–2028 гадоў. Старшыня Барыс Балахонаў прадставіў свае ідэі па развіцці навуковага патэнцыялу маладых навукоўцаў, прапанаваў серыю ініцыятыў, накіраваных на стымуляванне даследчай актыўнасці.
Акрамя таго, Барыс Балахонаў прапанаваў правядзенне рэгулярных навуковых семінараў і круглых сталоў, на якіх маладыя даследчыкі змогуць прадстаўляць свае праекты, атрымліваць канструктыўную крытыку і абменьвацца меркаваннямі. Ён таксама падкрэсліў важнасць выхаду Савета ў медыяпрастору для папулярызацыі навуковых ініцыятыў і дасягненняў універсітэта. Старшыня прапанаваў актыўна выкарыстоўваць сацыяльныя сеткі і іншыя лічбавыя платформы для распаўсюджвання інфармацыі аб навуковых праектах, правядзенні мерапрыемстваў і дасягненнях маладых вучоных.
Пасля выступленняў адбылася дыскусія, падчас якой удзельнікі сходу актыўна дзяліліся сваімі думкамі і прапановамі па паляпшэнні работы Савета.
Гродзенскі дзяржаўны ўніверсітэт імя Янкі Купалы