У навуковай бібліятэцы Гродзенскага дзяржаўнага ўніверсітэта імя Янкі Купалы 8 мая адбылося адкрыццё выстаўкі лепшых работ, прадстаўленых на конкурс “Жывем! Памятаем! Ганарымся!».
Арганізатарам конкурсу традыцыйна выступіў факультэт эканомікі і кіравання. Конкурс прысвечаны 79-й гадавіне Перамогі ў Вялікай Айчыннай вайне і 35-годдзю вываду савецкіх войскаў з Афганістана. Мэта конкурсу - выхаванне ў падрастаючага пакалення паважлівага стаўлення да памяці аб абаронцах Айчыны, да гераічных подзвігаў воінаў у Вялікай Айчыннай вайне 1941-1945 гадоў, да памяці воінаў-інтэрнацыяналістаў, фарміраванне духоўна-маральнай і грамадзянска-патрыятычнай культуры.
У конкурсе прынялі ўдзел навучэнцы і супрацоўнікі ўстаноў агульнай сярэдняй адукацыі, каледжаў, вышэйшых навучальных устаноў горада Гродна, Гродзенскай і Мінскай абласцей. Узнагароды ўжо знайшлі сваіх пераможцаў. Найлепшыя работы прадстаўлены на выставе, у адкрыцці якой прынялі ўдзел студэнты і выкладчыкі факультэта эканомікі і кіравання, супрацоўнікі навуковай бібліятэкі і прарэктар па выхаваўчай рабоце Васіль Сянько, які адзначыў важнасць захавання памяці нашых суайчыннікаў аб подзвігах у Вялікай Айчыннай вайне і аб тых, хто падарыў нам спакойнае і мірнае жыццё!
Студэнтка 1 курса спецыяльнасці "Бухгалтарскі ўлік, аналіз і аўдыт" Дар'я Бурмістрава, якая атрымала заслужаную ўзнагароду ў конкурсе малюнкаў, прачытала эсэ пра Вялікую Айчынную вайну. Студэнт 3 курса спецыяльнасці "Эканоміка і кіраванне на прадпрыемстве" Леанід Ціпуноў выступіў з вершам аб Афганскай вайне. Падзяліўся сваімі ўспамінамі аб ветэранах і дырэктар навуковай бібліятэкі Мікалай Грынько.
Выстаўка будзе дзейнічаць да 22 мая ў навуковай бібліятэцы галоўнага корпуса ўніверсітэта. Запрашаем азнаёміцца з экспазіцыяй!
Гродзенскі дзяржаўны ўніверсітэт імя Янкі Купалы