На выставе, прымеркаванай да Дня абароны дзяцей і «Года малой радзімы», школьнікі Гродна прадставілі больш за 30 работ.
Выстава дзіцячай творчасці «Дзіўны свет» працягвае традыцыі факультэта мастацтваў і дызайну, знаходзіць новыя таленты і здольнасці сярод навучэнцаў школ Гродна. У гэтым годзе ў экспазіцыю выставы ўвайшлі лепшыя творчыя работы навучэнцаў гімназіі № 5 г. Гродна і сярэдняй школы № 16 г. Гродна ад 6 да 12 гадоў, выкананыя пад кіраўніцтвам педагогаў у розных тэхніках: акварэль, гуаш, каляровыя алоўкі, змешаная тэхніка і інш .
Конкурсная камісія на чале з загадчыкам кафедры выяўленчага мастацтва Анатолем Бурчыкам і старшым выкладчыкам Алай Каляга ацанілі адпаведнасць работ тэматыцы конкурсу, арыгінальнае раскрыццё тэмы, цэласнасць і змястоўнасць вобраза, творчую індывідуальнасць работ удзельнікаў. У складзе журы таксама працавалі студэнткі 3 курса спецыяльнасці "Выяўленчае мастацтва і камп'ютарная графіка" Таццяна Вайцяхоўская і Юлія Ванішэўская.
Па выніках ацэнкі конкурснай камісіі былі вызначаны лепшыя працы. Так, дыпломам 1 ступені ўзнагароджаны навучэнец гімназіі № 5 г. Гродна Арцём Абасаў з працай «Касмічны нацюрморт», кіраўнік - Е.Л. Захарэвіч Праца «Марское падарожжа» Эвяліны Канавалік з сярэдняй школы № 16 г. Гродна ўдастоена дыплома 2 ступені, кіраўнік - А. В. Ізобаў. Дыпломам 3 ступені ўзнагароджаны навучэнец гімназіі № 5 г. Гродна, удзельнік узорнай студыі "Вытокі" Юрый Шавякоў з працай «Марскія глыбіні», кіраўнік - Е.Л. Кандрашук, і прадстаўнік сярэдняй школы № 16 г. Гродна Арцём Андрэйчык, які выканаў працу «Тры чарапахі» пад кіраўніцтвам А.В. Ізобава.
Усе ўдзельнікі выставы, арганізаванай з мэтай падтрымкі таленавітых дзяцей і стварэння ўмоў для іх творчага, інтэлектуальнага развіцця, атрымалі дыпломы ў намінацыях «Я малюю свет», «Гармонія колеру», «Беларуская палітра».
Гродзенскі дзяржаўны ўніверсітэт імя Янкі Купалы