Перад пачаткам іспытаў адбылося пасяджэнне прыёмнай камісіі. Удзельнікі абмеркавалі допуск абітурыентаў да ўступных іспытаў для атрымання агульнай вышэйшай і спецыяльнай вышэйшай адукацыі, а таксама падрабязна азнаёміліся з рэгламентам работы.

У першы дзень уступныя іспыты здалі 154 абітурыенты. Сёння свае веды прадэманстравалі будучыя філолагі, эканамісты і журналісты. Уступныя іспыты па спецыяльнасці «Беларуская філалогія» прайшлі па беларускай літаратуры, а для «Рускай філалогіі» экзамен быў арганізаваны па рускай літаратуры. Абітурыенты, якія паступаюць на «Журналістыку», здавалі ўступны іспыт «Творчасць (першы этап)». Для тых, хто паступае на «Інфармацыйныя сістэмы і тэхналогіі», выпрабаванне ўключала «Ахову працы. Ахову навакольнага асяроддзя і энергазберажэнне», а для спецыяльнасці «Фінансы і крэдыт» абітурыенты здавалі іспыт «Эканоміка арганізацыі».

Сваімі эмоцыямі пасля здачы ўступнага іспыту падзяліўся Кірыл Расіхін, выпускнік сярэдняй школы № 15 імя Д.М. Карбышава г. Гродна.

– Сёння адбыўся мой першы ўступны іспыт «Творчасць», а менавіта сачыненне. Эмоцыі зараз проста зашкальваюць! Сказаць, што я хваляваўся, нічога не сказаць. У нейкі момант ад адказнасці нават думкі пачалі блытацца, але мне ўдалося ўзяць сябе ў рукі і справіцца з хваляваннем. Я ўпэўнены, што змог цалкам раскрыць тэму і данесці свае галоўныя ідэі да экзаменацыйнай камісіі, – адзначыў Кірыл.

Малады чалавек паступае на спецыяльнасць «Журналістыка». Кірыл прызнаецца, што свет медыя, тэкстаў і жывых зносін прыцягваў яго заўсёды. Таму, калі надышоў час выбіраць месца для вучобы, Кірыл цвёрда і ўпэўнена вырашыў, што будзе паступаць у ГрДУ імя Янкі Купалы.

Трэба адзначыць, што перад пачаткам экзаменацыйнага перыяду для абітурыентаў прайшлі кансультацыі. Яны адбыліся напярэдадні ўступных іспытаў у вочным фармаце, а таксама ў любы зручны час у фармаце відэакансультацый на сайце abit.by.

Нагадаем, што праца прыёмнай камісіі ў ГрДУ імя Янкі Купалы працягнецца па 1 жніўня для абітурыентаў, якія жадаюць вучыцца на платнай аснове.