Адкрыццё выставы прайшло ў галоўным корпусе ўніверсітэта. На мерапрыемстве прысутнічалі кіраўніцтва Купалаўскага ўніверсітэта і Гуманітарнага каледжа, а таксама студэнты і навучэнцы. Выставу адкрыла пранікнёная кампазіцыя «Мой родны кут, як ты мне мілы» ў выкананні Івана Вайтовіча, выпускніка і выкладчыка Гуманітарнага каледжа. Рэктар Гродзенскага дзяржаўнага ўніверсітэта імя Янкі Купалы Ірына Кітурка выступіла з віншавальнай прамовай.

– Гуманітарны каледж займае важнае месца ў структуры Гродзенскага дзяржаўнага ўніверсітэта імя Янкі Купалы. Вы знаходзіцеся ў пастаянным развіцці, цешыце сваімі дасягненнямі і таленавітымі студэнтамі і рыхтуеце высокакваліфікаваных спецыялістаў. Жадаю моцнага здароўя, поспехаў у розных сферах дзейнасці. Выкладчыкам - добрых, дапытлівых і таленавітых навучэнцаў, дзецям - цікавасці да вучобы. Са святам! – павіншавала Ірына Фёдараўна калектыў каледжа і яго навучэнцаў з юбілеем.

Выстаўка ўяўляе сабой творчую справаздачу самай маладой спецыяльнасці Гуманітарнага каледжа ГрДУ імя Янкі Купалы – «Дызайн (графічны)». Тут прадстаўлены работы студэнтаў 3 курса, выкананыя ў рознай тэхніцы: акварэллю, алоўкам, акрылам, гуашшу, а таксама ў змешанай тэхніцы. Азнаёміцца з экспазіцыяй можа кожны ахвочы ў холе другога паверха галоўнага корпуса.

Выстава адкрыла калейдаскоп падзей і мерапрыемстваў, прысвечаных 125-годдзю Гуманітарнага каледжа ГрДУ імя Янкі Купалы, якія будуць праходзіць на працягу двух тыдняў. У гонар гэтай падзеі запланаваны розныя мерапрыемствы, у тым ліку сольны канцэрт Івана Вайтовіча, музычная экскурсія па імянных аўдыторыях каледжа, канцэрт Заслужанага калектыву Рэспублікі Беларусь «Беларускі дзяржаўны ансамбль «Песняры», творчая сустрэча з дзіцячым пісьменнікам Віктарам Кудлачовым, фінал серыі гульняў «Што? Дзе? Калі?», прысвечанай казкам А.С. Пушкіна і многія іншыя мерапрыемствы.

З гісторыі

Гуманітарны каледж размешчаны ў самым цэнтры Гродна, у будынку ХІХ стагоддзя. Сваю гісторыю навучальная ўстанова пачынае ў 1899 годзе. У розныя гады свайго існавання навучальная ўстанова была вучылішчам, жаночай гімназіяй, школай, а ў верасні 1939 года адкрыўся як педагагічнае вучылішча.

У 2004 годзе Гуманітарны каледж стаў часткай Гродзенскага дзяржаўнага ўніверсітэта імя Янкі Купалы. Умацавалася матэрыяльная база, актывізавалася работа ў галіне рэалізацыі эксперыментальных праектаў, якія далі магчымасць узняць на новы сучасны ўзровень спецыяльнасці, па якіх вядзецца падрыхтоўка ў навучальнай установе. Вынікам гэтага сталі значныя поспехі нашых навучэнцаў на рэспубліканскіх і міжнародных конкурсах прафесійнага майстэрства.