Рэспубліканскі конкурс навуковых работ – гэта праект, накіраваны на раскрыццё навуковага патэнцыялу моладзі. У гэтым годзе конкурс праходзіў з 1 кастрычніка 2025 года па 6 сакавіка 2026 года. Удзельнікамі сталі студэнты і выпускнікі 53 устаноў вышэйшай адукацыі, у тым ліку філіялы. Канкурэнцыя была высокай: на суд журы было прадстаўлена каля трох тысяч работ па розных кірунках навукі.

Па выніках адбору званне лаўрэата было прысвоена аўтарам толькі 60 работ, з якіх 48 падрыхтаваны індывідуальна, а яшчэ 12 – у сааўтарстве. Прызнанне атрымалі дзве выпускніцы Купалаўскага ўніверсітэта. Анастасія Воўк, выпускніца факультэта гісторыі, камунікацыі і турызму, выступіла ў секцыі «Філалогія, мовазнаўства, літаратуразнаўства. Літаратура як адлюстраванне нацыянальна-духоўнага развіцця беларускага народа. Журналістыка» з работай «Спецыфіка інструментаў прасоўвання школ англійскай мовы ў сацыяльнай сетцы Instagram». Яе навуковы кіраўнік – Ганна Рыжковіч, дацэнт кафедры журналістыкі ГрДУ імя Янкі Купалы.

Званне лаўрэата таксама атрымала Аляксандра Касач, выпускніца інжынернага факультэта. Яна прадставіла работу «Распрацоўка канструкцыі і матэрыялу газоннай рашоткі для паркоўкі легкавых аўтамабіляў» пад кіраўніцтвам Аляксандра Антонава, дацэнта кафедры матэрыялазнаўства і рэсурсазберагальных тэхналогій ГрДУ імя Янкі Купалы, у секцыі «Машынабудаванне. Механіка машын. Надзейнасць і бяспека тэхнічных сістэм».

Гродзенскі дзяржаўны ўніверсітэт імя Янкі Купалы шчыра віншуе Анастасію Воўк і Аляксандру Касач, а таксама іх навуковых кіраўнікоў з гэтай перамогай і жадае новых навуковых дасягненняў!