У Дзень беларускай навукі, 25 студзеня, у інтэрнатах Гродзенскага дзяржаўнага ўніверсітэта імя Янкі Купалы па адрасах: вул. Дубко, 20, вул. Даватара, 27 і вул. Пралетарская, 16 адбылася інтэлектуальная гульня «Купалаўская навука». Мерапрыемства было арганізавана Студэнцкім навуковым таварыствам і Саветам маладых вучоных універсітэта.У рамках гульні каманды дэманстравалі эрудыцыю, логіку і хуткасць рэакцыі, каб адказаць на каверзныя пытанні з самых розных сфер навукі.
Пасля напружанай барацьбы перамогу ў гульні падзялілі дзве каманды. Каманда фізіка-тэхнічнага факультэта «Фіз-тэх лепш за ўсіх» пацвердзіла высокі ўзровень ведаў і сваю вынаходлівасць. Каманда факультэта эканомікі і кіравання «MoneyТролі» выдатна паказала сябе ў разліках і прадэманстравала ўсім сваё стратэгічнае мысленне.
«Купалаўская навука» стала сапраўдным інтэлектуальным святам. Дадзенае мерапрыемства даказала, што навука – гэта не сумныя лекцыі і незразумелыя формулы, а цікавы, захапляльны свет, веданне якога абавязкова будзе карысна і спатрэбіцца ў жыцці.
