Адкрыў мерапрыемства першы прарэктар Купалаўскага ўніверсітэта Аляксандр Карэўскі. Звяртаючыся да гасцей мерапрыемства, ён выказаў радасць, што "Ноч музеяў" зноў праводзіцца ў Гродзенскім дзяржаўным універсітэце імя Янкі Купалы, а таксама адзначыў важнасць канцэпцыі акцыі, якая дае магчымасць стаць бліжэй і фізічна, і ментальна да экспанатаў, якія будуць дэманстравацца. У завяршэнне сваёй прамовы ён пажадаў усім цікавага баўлення часу.

Старт мерапрыемству далі дзве розныя, але па-свойму займальныя экспазіцыі: калекцыя ваз сям'і прафесара Віктара Таранцея "Усходняя казка" і рэтра-паштоўкі "Гісторыя сям'і ў паштоўках савецкай эпохі".

Потым удзельнікі ў поўнай меры акунуліся ў гісторыю. Яны змаглі праверыць свае веды пра музеі свету, Беларусь і Музей ГрДУ імя Янкі Купалы ў рамках інтэлектуальнай гульні «МУЗЕЕМАНІЯ», даведацца больш пра гісторыю Купалаўскага ўніверсітэта і прадэманстраваць эрудыцыю на экскурсіі-віктарыне «Там стаіць пад імем Купалы…», а таксама даведацца больш пра знакамітых беларусак на лекторыі-віктарыне «Славутыя жанчыны Беларусі».

Асаблівую цікавасць выклікалі ў гасцей гульня па пошуку зніклага артэфакта з Музея гісторыі развіцця ГрДУ імя Янкі Купалы і выстава аўтарскіх лялек студэнтаў факультэта мастацтваў і дызайну “КУКЛООБРАЗ”, у рамках якой студэнты факультэта мастацтваў і дызайну прадэманстравалі сваё бачанне таго, як у лялечным вобразе выглядае кожны факультэт ГрДУ імя Янкі Купалы і міфічныя істоты беларускага фальклору.

Для большага апускання ў гістарычную эпоху 20 стагоддзі купалаўцам выдалася магчымасць паглядзець рэтра-фільм «Вясёлыя рабяты». Яркіх уражанняў дадала дыскатэка з песнямі 1940-1980-х гадоў і магчымасць сыграць у настольныя гульні.

Гэтае мерапрыемства стала яскравым прыкладам таго, што паход у музей і вывучэнне гісторыі праз разглядванне экспанатаў можа быць не толькі пазнавальным, але і вясёлым.