16 ліпеня ў Гродзенскім дзяржаўным гісторыка-археалагічным музеі адбылася ўрачыстая цырымонія перадачы капсулы з пасланнем будучым пакаленням у рамках ваенна-патрыятычнай акцыі “Лісты нашчадкам. 100-годдзю Вялікай Перамогі прысвячаецца!». Удзельнікамі знакавай падзеі сталі прадстаўнікі студэнцкага актыву Гродзенскага дзяржаўнага ўніверсітэта імя Янкі Купалы.Сімвалічна, што такая знакавая падзея ў Гродне праходзіць менавіта 16 ліпеня - у 82-ю гадавіну вызвалення горада ад нямецка-фашысцкіх захопнікаў.
Удзельнікамі акцыі сталі прадстаўнікі Міністэрства абароны Рэспублікі Беларусь, мясцовых органаў улады, грамадскіх аб'яднанняў і ветэранскіх арганізацый горада, службовыя асобы ваеннага камісарыята Гродзенскай вобласці, а таксама навучэнцы ваенна-патрыятычных класаў і студэнцкая моладзь. Сведкамі ўрачыстай цырымоніі перадачы капсулы ад Гродзенскага дзяржаўнага ўніверсітэта імя Янкі Купалы сталі прадстаўнікі студэнцкай рады, першаснай прафсаюзнай арганізацыі навучэнцаў і першаснай арганізацыі ГА «БРСМ».
Ганаровая місія перадачы капсулы выпала ветэрану Вялікай Айчыннай вайны Івану Няўзараву. Звяртаючыся да прысутных, ён падкрэсліў, што самым галоўным пасланнем будучым пакаленням з'яўляецца любіць і берагчы сваю Радзіму, а тым, хто пойдзе на службу, служыць ёй з гонарам.
Пасланне з капсулы будзе адкрыта ў 2045 годзе, у стогадовы юбілей Вялікай Перамогі.
Арганізатарам акцыі выступіла Міністэрства абароны Рэспублікі Беларусь. Да гэтага цырымоніі перадачы лістоў прайшлі ў Брэсце, Магілёве, Віцебску і Гомелі. Сёння чарга дайшла да Гродна і Мінска.
Перадача капсулы з пасланнем нашчадкам стала не проста ўрачыстай акцыяй, а дэманстрацыяй непарыўнай сувязі пакаленняў і сімвалам памяці. Памяці, якую трэба будзе захоўваць цяперашняй моладзі, а затым - перадаць яе будучаму пакаленню.
