«Рэспубліканскія Купалаўскія чытанні» традыцыйна з’яўляюцца важнай пляцоўкай для абмену ведамі, умацавання навуковых сувязей і натхнення новых пакаленняў даследчыкаў. Мерапрыемства спрыяе папулярызацыі спадчыны вялікага беларускага паэта і развіццю філалагічнай навукі ў Беларусі.

Урачыстае адкрыццё канферэнцыі пачалося з прывітальных слоў і афіцыйных зваротаў. Да ўдзельнікаў звярнуліся прарэктар па ідэалагічнай і выхаваўчай рабоце Васілій Сянько; дэкан філалагічнага факультэта, кандыдат філалагічных навук, дацэнт Святлана Ганчар і загадчык кафедры беларускай філалогіі, кандыдат філалагічных навук, дацэнт Алена Садоўская. Яны падкрэслілі важнасць захавання і развіцця спадчыны выдатнага беларускага песняра, а таксама актуальнасць філалагічных даследаванняў для ўніверсітэта і краіны.

Праграма навуковай канферэнцыі, як заўсёды, насычаная і шматпланавая. Яна ўключае пленарнае пасяджэнне, дзе з дакладамі выступяць навукоўцы з розных універсітэтаў, прадставіўшы вынікі сваіх даследаванняў. Асаблівая ўвага нададзена секцыйнай рабоце, якая ахоплівае некалькі ключавых напрамкаў: «Асоба Янкі Купалы і актуальныя праблемы купалазнаўства», «Актуальныя праблемы сучаснага літаратуразнаўства», «Актуальныя праблемы мовазнаўства» і «Студэнцкая навука ў гонар Янкі Купалы».

Завяршыцца канферэнцыя пасяджэннем, дзе з дапамогай дыскусіі будуць падведзены вынікі працы.