Мерапрыемствы былі арганізаваны ў рамках рэалізацыі дагавораў аб супрацоўніцтве паміж ГрДУ імя Янкі Купалы і арганізацыямі.

Са студэнтамі 2 і 4 курсаў спецыяльнасцей «Міжнароднае права» і «Эканамічнае права» сустрэліся прадстаўнікі Гродзенскай абласной калегіі адвакатаў – адвакат юрыдычнай кансультацыі Ленінскага раёна г. Гродна Улада Чарапіца-Дубікаўская і загадчык юрыдычнай калегіі Дзятлаўскага раёна Эдзіта Пяражок.

Маладыя адвакаты падрабязна расказалі студэнтамі пра асноўныя прынцыпы і задачы адвакатуры, перавагі кар'еры адваката, а таксама пра тое, якія крокі трэба зрабіць, каб паспяхова прайсці практыку, стажыроўку і стаць адвакатам. Таксама госці падзяліліся з купалаўцамі тым, у якіх мерапрыемствах, якія праводзяцца парадай маладых адвакатаў Беларускай рэспубліканскай калегіі адвакатаў, студэнты могуць прыняць удзел. На заканчэнне сустрэчы студэнтам паказалі ролік аб прафесіі адваката «Адвакатура Рэспублікі Беларусь».

У гэты ж дзень студэнты 4 курса спецыяльнасці «Правазнаўства» сустрэліся з прадстаўнікамі Гродзенскай рэгіянальнай мытні – начальнікам аддзела ідэалагічнай работы Сяргеем Даўгуном і намеснікам начальніка аддзела кадраў і прафесійнай падрыхтоўкі Наталляй Мазыркай.

Будучым выпускнікам расказалі аб асноўных напрамках дзейнасці Гродзенскай рэгіянальнай мытні, ролі мытных органаў у забеспячэнні эканамічнай бяспекі дзяржавы, спецыфіцы службы ў мытных органах і яе перавагах. Таксама студэнты даведаліся аб парадку працаўладкавання, патрабаваннях да работнікаў, карпаратыўнай культуры і традыцыях ведамства.

Праведзеныя сустрэчы сталі нагляднай дэманстрацыяй паспяховай рэалізацыі дамовы аб супрацоўніцтве і таго, якія кар'ерныя магчымасці чакаюць студэнтаў пасля выпуску.