У 110-м асобным палку матэрыяльнага забеспячэння ў Барысаве будучыя тылавікі праходзілі практыку цэлы месяц, апускаючыся ў сваю прафесійную дзейнасць. Экзамен па выніках практыкі ў іх прайшоў 12 жніўня. Месцам правядзення экзамену стала 2336-я база захоўвання рэчавай маёмасці.

Як адзначыў кіраўнік выніковай практыкі падпалкоўнік Дзмітрый Блашко, усе студэнты прадэманстравалі высокі ўзровень ведаў. Экзамен складаўся з дзвюх частак. Тэарэтычная частка экзамену ўключала пытанні пра аб'екты вайсковай гаспадаркі, месцы захоўвання рэчавай маёмасці і тэхнічных сродкаў, рэчавыя рамонтныя майстэрні і арганізацыю лазнева-пральнага забеспячэння. На практычнай частцы экзамена студэнты афармлялі ўліковыя дакументы, складалі схемы тылавога забеспячэння ва ўмовах баявой абстаноўкі і ўстанаўлівалі палаткі.

Пасля паспяховай здачы экзамену начальнік улікова-аперацыйнага аддзела 2336 БХВІ падпалкоўнік Антон Альвінскі ўручыў кожнаму байцу памятныя сувеніры.

А 13 жніўня на пляцы 110-га асобнага палка матэрыяльнага забеспячэння адбылася ўрачыстая цырымонія прыняцця ваеннай прысягі. Апроч саміх студэнтаў на мерапрыемстве традыцыйна прысутнічалі іх бацькі. Прымаючы прысягу, купалаўцы пакляліся быць адданымі сваёй Радзіме, выконваць воінскі статут і выконваць загады камандзіраў і начальнікаў.

Віншуем нашых байцоў-тылавікоў і жадаем ім далейшых поспехаў у службе!