Учора, 26 сакавіка, пад кіраўніцтвам старшыні Гродзенскага абласнога выканаўчага камітэта Юрыя Караева прайшло пасяджэнне, у рамках якога абмеркавалі ўзаемадзеянне паміж установамі адукацыі Гродзенскай вобласці і заказчыкамі кадраў.
Як паведамляе «Гродзенская праўда», да ўдзельнікаў пасяджэння звярнуўся старшыня Гродзенскага абласнога выканаўчага камітэта Юрый Караеў.
- Студэнты павінны быць гатовыя да рэальных умоў працы і адказнасці, - падкрэсліў Юрый Хаджымуратовіч. - Найбольш эфектыўным метадам падрыхтоўкі кадраў сёння з'яўляецца адкрыццё навучальных пляцовак непасрэдна на вытворчасці. Такая практыка дазволіць студэнтам з першых дзён вучобы пагрузіцца ў прафесію, а кіраўнікам прадпрыемстваў заўважыць таленавітых дзяцей задоўга да атрымання імі дыпломаў.
Начальнік галоўнага ўпраўлення адукацыі Гродзенскага абласнога выканаўчага камітэта Руслан Абрамчык адзначыў, што для забеспячэння рэгіёну кадрамі неабходна цеснае ўзаемадзеянне арганізацый-заказчыкаў і ўстаноў адукацыі, а таксама ўмацаванне матэрыяльнай базы каледжаў і адкрыццё лабараторый на базе прадпрыемстваў.
Статыстыка пацвярджае маштаб працы: на 1 сакавіка 2026 года ў Гродзенскай вобласці заключана ўжо 274 дагаворы аб узаемадзеянні паміж заказчыкамі кадраў і каледжамі. Сваю працоўную дзейнасць на Гродзеншчыне штогод пачынаюць 6 тысяч выпускнікоў.
У рамках пасяджэння абмеркавалі і мэтавую падрыхтоўку. За апошнія два гады больш за 130 арганізацый вобласці на пастаяннай аснове працуюць у гэтым напрамку. Трэба адзначыць, што больш за 85 сельскагаспадарчых прадпрыемстваў Гродзенскай вобласці ўжо сёння выплачваюць студэнтам з мэтавым напрамкам даплату да навучальнай стыпендыі.
У пасяджэнні прыняла ўдзел рэктар Гродзенскага дзяржаўнага ўніверсітэта імя Янкі Купалы Ірына Кітурка, бо адукацыйны працэс у гэтым пытанні адыгрывае найважнейшую ролю. За апошнія пяць гадоў ва ўстановах адукацыі Гродзеншчыны было адкрыта 17 новых спецыяльнасцей на двух узроўнях: сярэдняя спецыяльная і прафесійна-тэхнічная адукацыя. Ва ўстановах вышэйшай адукацыі - 6 спецыяльнасцяў. На сённяшні дзень у каледжах Гродзенскай вобласці створаны 5 сучасных цэнтраў кампетэнцый, на якіх будучыя спецыялісты могуць адточваць свае навыкі.
Гродзенскі дзяржаўны ўніверсітэт імя Янкі Купалы