З гродзенскімі паэтамі замежныя студэнты сустракаюцца ўжо не ў першы раз. У гэты раз у госці да студэнтаў прыйшлі члены Саюза пісьменнікаў Беларусі Дзмітрый Радзівончык, Людміла Шаўчэнка, Рыгор Гармаш і Святлана Тарасава. Паэты не толькі чыталі свае вершы, але дзяліліся цікавымі фактамі з біяграфіі, расказвалі пра свой творчы шлях. Дзмітрый Радзівончык пазнаёміў студэнтаў з дзейнасцю Гродзенскага абласнога аддзялення Саюза пісьменнікаў Беларусі, падзяліўся вопытам перакладу вершаў з беларускай мовы на рускую. Зразумелыя і блізкія прысутным сталі вершы Людмілы Шаўчэнкі пра вясну, пра каханне, пра маму. Рыгор Гармаш пакарыў слухачоў філасофскім асэнсаваннем жыцця ў сваёй творчасці. Ён прачытаў вершы не толькі на рускай, але і на ўкраінскай мове, прапанаваўшы студэнтам паспрабаваць зразумець, пра што гэтыя вершы. Вялікую цікавасць у замежных студэнтаў выклікала знаёмства з элементамі вершаскладання, пра якія распавяла Святлана Тарасава.

У сваю чаргу студэнты выступілі з чытаннем вершаў і выкананнем песень пра каханне.

Па традыцыі, быў праведзены інтэлект-тур «Пазнай паэта». Кожны, хто адгадаў, атрымаў прыз.

Скончылася сустрэча сумесным чытаннем верша Юліі Друнінай.