Фестываль маладзёжных інавацый "ІнаФэст" праводзіцца ў Купалаўскім універсітэце ўжо другі раз. У праграме II Форума «ІнаФэст» – прадстаўленне студэнтамі інавацыйных прататыпаў і праектных рашэнняў, публічная прэзентацыя міждысцыплінарных праектаў, а таксама дэманстрацыя напрамкаў навуковых даследаванняў і вынікаў навуковай дзейнасці маладых вучоных.

Сярод інавацыйных прататыпаў і праектных рашэнняў - студэнцкія распрацоўкі зусім рознай накіраванасці. У якасці прататыпаў тут прадстаўлены і «Дызайн-бюро ГрДУ», і «Smart glove», і «Геатэрмальная сістэма ацяплення прыватнага дома», і «Экацэгла ручной фармоўкі», і «Цацка-лекар «Тэдзі»», і «Канструктар дэсертаў» , і "Візуальнае даследаванне "Славянская міфалогія ў ілюстрацыі"", і многія іншыя цікавыя праекты.

II Форум "ІнаФэст" праводзіцца з мэтай падтрымкі і стымулявання творчага мыслення, развіцця прадпрымальніцкай актыўнасці і пошуку новых ідэй у розных галінах. Ён стварае спрыяльныя ўмовы для абмену досведам і ведамі паміж маладымі людзьмі, а таксама дае магчымасць прэзентаваць свае праекты і атрымаць зваротную сувязь ад экспертаў і прафесіяналаў у сваёй вобласці. Фестываль таксама садзейнічае фарміраванню супольнасці маладых наватараў, якія могуць у будучым разам працаваць над вырашэннем актуальных праблем і стварэннем новых прадуктаў і паслуг.

Маладыя распрацоўшчыкі з палаючымі вачыма апісвалі свае бізнес-канцэпцыі, абменьваліся амбіцыйнымі планамі на будучыню і натхнялі адзін аднаго на развіццё і поспех.

Так, адзін з праектаў студэнткі факультэта мастацтваў і дызайну Віялеты Запаснік “Візуальнае даследаванне “Славянская міфалогія ў ілюстрацыі”” уяўляе сабой сучаснае бачанне старажытных легенд і паданняў. Ілюстрацыі адлюстроўваюць герояў беларускай міфалогіі, такіх як "Зазоўка", "Русалка" і інш., яны намаляваны ў сучасным стылі, з выкарыстаннем сімвалаў і знакаў, абстрактных форм, каб падкрэсліць моц і энергію герояў. Дзяўчына плануе рэалізоўваць праект праз стварэнне ўнікальнай сувенірнай прадукцыі.

Марыя Швяцова, студэнтка педагагічнага факультэта, прадставіла распрацоўку "Канструктар дэсертаў".

- Канцэпцыя праекта "Канструктар дэсертаў" заключаецца ў тым, каб даць кліентам магчымасць стварыць свой уласны торт. Не абавязкова быць прафесійным кандытарам для таго, каб парадаваць сябе і блізкіх, - дастаткова набыць бокс, дзе ёсць усё неабходнае, - падзялілася Марыя.

Навучэнцы Тэхналагічнага каледжа ГрДУ імя Янкі Купалы прадставілі праект "Экацэгла ручной фармоўкі".

- Экацэгла вырабляюцца з гліны, пяску, саломы і іншых прыродных матэрыялаў. Яны поўнасцю бяспечныя для навакольнага асяроддзя і не будуць змяшчаць шкодных хімічных рэчываў. Цагліны будуць выпускацца ў розных памерах і формах, каб адпавядаць патрэбам розных будаўнічых праектаў. Акрамя таго, кліенты змогуць выбіраць з розных адценняў і тэкстур цэглы, каб стварыць унікальны дызайн свайго дома або будынка, - распавяла Дар'я Навіцкая, навучэнка Тэхналагічнага каледжа ГрДУ імя Янкі Купалы.

Прататып цацкі-ўрача "Тэдзі" прадставілі Аляксандр Катко і Міхаіл Лобач, студэнты фізіка-тэхнічнага факультэта:

- Наша распрацоўка - гэта цацка, у якую ўбудаваны датчыкі для вымярэння жыццёва важных паказчыкаў дзіцяці. Яна можа ў гульнявым працэсе фіксаваць стан дзіцяці, без стрэсу для самога дзіцяці. Таксама распрацоўка будзе карысная для бацькоў, бо ўся неабходная інфармацыя аб здароўі дзіцяці будзе ў выглядзе справаздачы размяшчацца ў мабільным дадатку. Сёння на беларускім рынку няма аналагаў падобнай цацкі, - распавёў Міхаіл Лобач, студэнт фізіка-тэхнічнага факультэта.

У рамках правядзення II Форума «ІнаФэст» адбылося ўзнагароджанне пераможцаў X Адкрытага конкурсу студэнцкіх бізнэс-ідэй інавацыйных стартапаў «ІнНаСтарт». За час правядзення конкурсу прэзентавалі 66 праектаў у 5 розных намінацыях. Узнагароды атрымалі і найлепшыя міждысцыплінарныя праекты.