Навучанне на курсах было пабудавана на спалучэнні разнастайных відаў аргдзейнасных заняткаў. Актыўная форма навучання знайшла рэалізацыю ў ходзе трэнінгаў, круглых сталоў, дыскусійных пляцовак, групавых праектаў, прамежкавай і выніковай рэфлексіі. Мадэратары выкарыстоўвалі аўдыторную і пазааўдыторную, індывідуальную і групавую працу. На заключным этапе курсаў слухачы ГрДУ імя Янкі Купалы і Полацкага дзяржаўнага ўніверсітэта асвойвалі змест модуля «Дызайн курса» ў форме дыстанцыйных заняткаў.

Прадуктыўнымі вынікамі курсаў сталі праекты дарожнай карты павышэння культуры якасці адукацыі, сцэнарыі навучальных заняткаў з выкарыстаннем актыўных метадаў навучання, навучальныя відэаролікі, рэфлексіўныя апусканні ў тэматыку камандаўтварэння і ўзаемнага навучання, эсэ на тэму "Мой паспяховы або няўдалы вопыт інтэрактыўнага навучання", праекты па тэме у адукацыі, сілабусы ўласных навучальных курсаў.

Пры падвядзенні вынікаў сёмага сезона курсаў "Універсітэт адукацыйных інавацый" начальнік вучэбна-метадычнага ўпраўлення Марына Калацэй падзякавала выкладчыкам за свядомае імкненне ўдасканальваць і развіваць культуру якасці прафесійнай дзейнасці.

- Мы вітаем Вашу актыўнасць, мэтанакіраванасць, матываванасць, гатоўнасць трансляваць і распаўсюджваць набыты вопыт у маштабах універсітэта, - адзначыла Марына Яцэкаўна. - Паказальна, што курсы адзначаны спробай пашырэння карпаратыўнай культуры якасці за кошт прыцягнення да навучання метадыстаў вучэбна-метадычнага кіравання, якія далучыліся да праблематыкі вучэбнай працы сваіх калегаў выкладчыкаў.

У час заключнага мерапрыемства слухачы падзяліліся сваімі думкамі з мадэратарамі і арганізатарамі курсаў. На думку многіх, курсы дазволілі скласці дакладнае ўяўленне аб тым, якой у ідэале павінна быць якасная практыка навучання, як пазбегнуць непатрэбных памылак пры распрацоўцы і рэалізацыі адукацыйных праграм, як шліфаваць і ўдасканальваць дасягнутае. Былі выказаны прапановы па развіцці культуры якасці выкладання і навучання ва ўніверсітэце.

Словы падзякі прагучалі на адрас мадэратараў курсаў. Змястоўную і арганізацыйную працу слухачоў забяспечылі начальнік вучэбна-метадычнага ўпраўлення Марына Калацэй, загадчык лабараторыі адукацыйных інавацый Алег Каляга, вядучы спецыяліст аддзела электронных камунікацый цэнтра па сувязях з грамадскасцю Наталля Піткевіч, вядучы спецыяліст вучэбна-навукова-вытворчага аб'яднання кафедры эксперыментальнай і прыкладной псіхалогіі Аляксандр Колышка, загадчык кафедры ўзроставай і педагагічнай псіхалогіі Лілія Даўкша, загадчык кафедры агульнай і сацыяльнай псіхалогіі Анжэла Пеўнева, старшы выкладчык кафедры агульнай і сацыяльнай псіхалогіі Вольга Мальцава, старшы выкладчык кафедры агульнай і сацыяльнай псіхалогіі Роберт Панін. Асаблівую ўдзячнасць слухачоў заслужыла актрыса Гродзенскага абласнога тэатра лялек Людміла Паўлоўская за серыю майстар-класаў па развіцці тэхнікі прамовы.