17 лютага ў Гродзенскім дзяржаўным універсітэце імя Янкі Купалы прайшла дыялогавая пляцоўка са слухачамі Школы камандзіраў і камісараў. Удзельнікі атрымалі магчымасць задаць пытанні і пазнаёміцца з базай актуальных вакансій для працы ў Трэцім працоўным семестры.Сустрэча стала важным этапам падрыхтоўкі да будучага працоўнага сезона. З гасцямі мерапрыемства сустрэўся прарэктар па ідэалагічнай і выхаваўчай рабоце Васіль Сянько. Ён абмеркаваў з будучымі камандзірамі і камісарамі арганізацыйныя моманты, а таксама адказаў на ўсе пытанні.
Адмысловая ўвага на мерапрыемстве была нададзена месцам будучай працы. Арганізатары прадставілі студэнтам больш за 40 вакансій ад вядучых прадпрыемстваў і арганізацый Гродзеншчыны. Падрабязней азнаёміцца з вакансіямі і падаць заяўку на працу актывісты змогуць на адукацыйным партале ў раздзеле «Студаатрады».
Нагадаем, што «Школа камандзіраў і камісараў» – гэта адукацыйная праграма, у рамках якой праходзяць тэарэтычныя і практычныя заняткі па асновах фарміравання студэнцкіх атрадаў. У гэтым навучальным годзе яна праходзіла з 20 лістапада па 16 снежня 2025 года і сабрала 48 слухачоў. На працягу некалькіх тыдняў студэнты вывучалі тэорыю і асвойвалі практычныя навыкі, неабходныя для кіраўніцтва студэнцкімі атрадамі. Праграма ўключала лекцыі аб гісторыі і традыцыях руху на Гродзеншчыне, прававыя аспекты працоўных адносін, пытанні нарміравання і аплаты працы, а таксама заняткі па эфектыўнай камунікацыі і ўзаемадзеянні з працадаўцамі.
