20 снежня прадстаўнікі Гродзенскага дзяржаўнага ўніверсітэта імя Янкі Купалы далучыліся да маштабнай дабрачыннай акцыі «Нашы дзеці». Разам з высокапастаўленымі гасцямі купалаўцы павіншавалі выхаванцаў Васілішкаўскага дзіцячага сацыяльнага пансіяната "Васількі" з Новым годам і ўручылі ім падарункі.Ганаровым госцем мерапрыемства стаў намеснік Прэм'ер-міністра Рэспублікі Беларусь Юрый Шулейка. Ён павіншаваў выхаванцаў і работнікаў пансіяната з надыходзячымі святамі, уручыў салодкія падарункі, а таксама сертыфікат на набыццё дзіцячага вулічнага гульнявога комплексу.
Да віншавання таксама далучыліся намеснік губернатара Гродзенскай вобласці Віктар Пранюк і кіраўнік Шчучынскага раёна Аляксей Садоўскі.
Актыўны ўдзел у акцыі прынялі прадстаўнікі Гродзенскага дзяржаўнага ўніверсітэта імя Янкі Купалы. Ад установы адукацыі Васілішкаўскі дзіцячы сацыяльны пансіянат наведалі начальнік сацыяльна-педагагічнай і псіхалагічнай службы ўпраўлення па ідэалагічнай і выхаваўчай рабоце Таццяна Манчак, педагог сацыяльны 1 катэгорыі сацыяльна-педагагічнай і псіхалагічнай службы ўпраўлення па ідэалагічнай і выхаваўчай рабоце Валянціна Есіна і валанцёры Цэнтра валанцёрскай дзейнасці.
Дзякуючы агульнаму намаганню купалаўцаў былі выкананы 163 лісты-пажаданні выхаванцаў пансіяната. Разам з падарункамі Купалаўскі ўніверсітэт таксама падарыў дзіцячаму сацыяльнаму пансіянату «Васількі» сертыфікат на тысячу рублёў для далейшага развіцця.
Рэспубліканская дабрачынная акцыя «Нашы дзеці» – адна з самых чароўных акцый года. Яна аб'ядноўвае тысячы неабыякавых людзей па ўсёй Беларусі, каб стварыць сапраўдны навагодні цуд для тых, хто асабліва мае ў гэтым патрэбу. Для Гродзенскага дзяржаўнага ўніверсітэта імя Янкі Купалы гэтая акцыі – добрая, шматгадовая традыцыя, якая дае магчымасць стаць часткай навагодняга чараўніцтва.
