Павітаў прысутных дырэктар навуковай бібліятэкі ГрДУ імя Янкі Купалы Мікалай Грынько. Ён падкрэсліў, што выстава, якая размясцілася ў бібліятэцы - першая ў такім родзе ў сценах Купалаўскага ўніверсітэта:

-Кожная кніга тут – сапраўды незвычайная. Таму што ў ёй пакінуты надпіс – аўтограф – ад аўтара на памяць чытачу. Асабліва выставу варта наведаць тым, хто цікавіцца гісторыяй і гістарыяграфіяй – паглядзець, што гэта за аўтографы, пацікавіцца іх зместам, паразважаць пра сэнс напісаннага.

Выстава "Пра што кажуць аўтографы" - гэта некалькі дзясяткаў кніг, падораных прафесару ГрДУ імя Янкі Купалы Валерыю Чарапіцы аўтарамі друкаваных выданняў. Кнігі з аўтографамі вядучы навуковец-гісторык Гродзеншчыны збіраў на працягу ўсяго жыцця. Мастацкія, навуковыя і навукова-папулярныя, манаграфічныя, аўтабіяграфічныя - з кожнай звязаная свая, унікальная гісторыя. І таму асаблівымі сталі аўтографы ў кнігах: «у падзяку за супрацоўніцтва», «на доўгую памяць», «з пажаданнямі новых творчых адкрыццяў». Сярод тых, хто пакінуў аўтограф для гродзенскага вучонага - вядомы беларускі паэт Пятрусь Броўка, а таксама Мітрапаліт Мінскі і Слуцкі Філарэт.

- Гэтая выстава - сімвалічная падзяка людзям, з якімі мне давялося на жыццёвым і творчым шляху сустракацца, мець зносіны і працаваць, - адзначыў прафесар Валерый Чарапіца.

У цёплым, нефармальным дыялогу з гасцямі выставы Валерый Мікалаевіч таксама падзяліўся ўспамінамі з дзяцінства і юнацтва, адзначыўшы, што менавіта ў раннім узросце зарадзілася цікавасць да кніг, а з імі - і да багатага гістарычнага мінулага.

Выстава "Пра што кажуць аўтографы" працягнецца ў Купалаўскім універсітэце да 18 лютага. Пазнаёміцца ​​з кнігамі калекцыі можна ў чытальнай зале навуковай бібліятэкі галоўнага корпуса ўніверсітэта (Ажэшкі, 22, аўд. 116).