Размеркаванне на працу атрымалі студэнты спецыяльнасці «Вытворчасць прадукцыі і арганізацыя грамадскага харчавання», а таксама магістранты спецыяльнасці «Экалогія».

Падчас першага пасяджэння камісіі па размеркаванні выпускнікоў 2020 года накіраванні на працу атрымалі таксама студэнты, якія навучаліся на платнай аснове. Такой магчымасцю студэнты Купалаўскага ўніверсітэта карыстаюцца даволі часта. І пры наяўнасці заявак ад арганізацый і прадпрыемстваў-заказчыкаў кадраў, студэнты, якія праходзілі навучанне на платнай аснове, забяспечваюцца першым рабочым месцам, разам з якім атрымліваюць статус маладога спецыяліста і сацыяльныя гарантыі.

- Больш за палову з размеркаваных сёння студэнтаў праходзілі вытворчую практыку па месцы будучага працаўладкавання і добра сябе там зарэкамендавалі, - адзначыў прарэктар па вучэбнай рабоце Генадзій Гачко. - Ва ўніверсітэце добра адпрацаваны наступны механізм размеркавання: мы адпраўляем на практыку студэнтаў, яны прыглядаюцца да свайго будучага месца працаўладкавання, працадаўцы знаёмяцца з імі. Добра зарэкамендаваўшы сябе, студэнт мае магчымасць атрымаць імянную заяўку. Працадаўца бярэ менавіта таго спецыяліста, у якім ён зацікаўлены. У сваю чаргу і мы зацікаўлены, каб нашаму выпускніку было камфортна на першым працоўным месцы. Ад гэтага залежыць яго далейшы прафесійны шлях.

Пераважная большасць выпускнікоў ГрДУ імя Янкі Купалы размяркоўваюцца на прадпрыемствы і ў арганізацыі Гродзенскай вобласці. Штогод выпускнікі ўніверсітэта паступаюць на службу і ў сілавыя структуры. І гэта вынік рэгулярных сустрэч з прадстаўнікамі Упраўлення ўнутраных спраў, Дзяржаўтаінспекцыі, службы Дэпартамента аховы, Гродзенскай рэгіянальнай мытні, якія праводзяцца са студэнтамі ўніверсітэта. Акрамя таго, будучыя выпускнікі падчас падобных сустрэч маюць магчымасць мець зносіны з прадстаўнікамі арганізацый-заказчыкаў кадраў, з якімі ў Купалаўскага ўніверсітэта наладжана цеснае супрацоўніцтва.

У лістападзе ў ГрДУ імя Янкі Купалы пройдзе размеркаванне студэнтаў яшчэ па трох спецыяльнасцях першай ступені вышэйшай адукацыі: «Тэхнічная эксплуатацыя аўтамабіляў», «Транспартная лагістыка» і «Лінгвістычнае забеспячэнне міжкультурных камунікацый». Гэта выпускнікі, якія пакінуць сцены роднага ўніверсітэта з дыпломамі аб заканчэнні вышэйшай навучальнай установы ўжо ў студзені 2020 года. Усяго ж у 2020 годзе дыпломы аб вышэйшай адукацыі атрымаюць 2374 выпускніка-купалаўца. З іх - 767 выпускнікоў, якія атрымліваюць адукацыю за кошт сродкаў рэспубліканскага бюджэту на дзённай форме навучання, атрымаюць гарантаванае першае працоўнае месца.