Удзельнікаў калегіі на пляцоўцы купалаўскага ўніверсітэта сустракалі героі грамадзянска-патрыятычнага праекта «Жывая гісторыя», - класік беларускай паэзіі і настаўнік Алаіза Пашкевіч, якая тварыла пад вядомым кожнаму псеўданімам Цётка, паэтка, празаік і мастак Зоська Верас, беларуская паэтка Канстанцыя Буйло, пісьменніца Эліза Ажэшка, вядомы палітычны і грамадскі дзеяч свайго часу, рэфарматар, мецэнат і гродзенскі стараста Антоній Тызенгаўз, манашка і асветніца Еўфрасіння Полацкая. У гэтых персаналій па майстэрску пераўвасобіліся студэнты ГрДУ імя Янкі Купалы, якія чыталі ўрыўкі з твораў культурных дзеячаў. Дарэчы, гістарычныя касцюмы для персанажаў праекта стварылі студэнткі факультэта мастацтваў і дызайну. Іх высока ацанілі госці.

Аб сваіх дасягненнях і перамозе на рэспубліканскім конкурсе «Студэнт года - 2017» распавяла ўладальніца ганаровага тытула, студэнтка філалагічнага факультэта Гродзенскага ўніверсітэта Аляксандра Радковіч. Дзяўчына прадставіла ўвазе адміністрацыі вобласці інтэрактыўнае партфоліо і відэаролікі.

–Партфоліо Аляксандры ўразіла гасцей. І гэта не дзіўна, бо яно ў незвычайнай форме прэзентуе поспехі і дасягненні нашай студэнткі, яе лепшыя чалавечыя якасці і, вядома, таленты. Спецыяльна для партфоліо спецыялісты ўніверсітэта на 3D-друкарцы раздрукавалі фігурку з выявай Аляксандры, - адзначыла начальнік аддзела падтрымкі і рэалізацыі маладзёжных праектаў і ініцыятыў УВРсМ Алена Поцька.

Сваю дзейнасць прадставілі ўдзельніцы першаснай арганізацыі купалаўскага ўніверсітэта «Беларускі саюз жанчын» на чале са старшынёй, дэканам факультэта эканомікі і кіравання Марынай Карпіцкай.

На выставе можна было пазнаёміцца ​​з метадычнымі распрацоўкамі выхаваўчых мерапрыемстваў у Гродзенскім дзяржуніверсітэце імя Янкі Купалы ў 2017 годзе, навуковымі публікацыямі навукоўцаў універсітэта, а таксама са спартыўнымі дасягненнямі студэнтаў. У скарбонцы зборнай студэнтаў альма-матэр шматлікія перамогі на Рэспубліканскай універсіядзе - 2017, міжнародных спаборніцтвах і рэспубліканскіх чэмпіянатах. Акрамя таго, удзельнікам выставы распавялі пра прымяненне ў навучанні інавацыйных адукацыйных тэхналогій, правядзенні рэгулярных вебінараў для вучняў, настаўнікаў, студэнтаў і выкладчыкаў Беларусі.

Таксама была прадстаўлена пляцоўка Гуманітарнага каледжа ГрДУ імя Янкі Купалы. Тут кожны мог прыняць удзел у майстар-класе па вырабе валошкаў з паперы і больш даведацца пра канцэпцыю «КАЛЕДЖ - музей», якую паспяхова рэалізуюць ва ўстанове на працягу ўжо некалькіх гадоў. Нагадаем, што ў 2016 годзе калідоры і аўдыторыі каледжа ператварыліся ў музейныя пакоі з унікальнымі і цікавымі экспанатамі, прысвечанымі розным эпохам і асобам.