Арганізацыю мерапрыемства ўзяла на сябе студэнтка 1 курса факультэта сацыяльна-педагагічнай і псіхалагічнай адукацыі, Разалія Жадзецкая. Яе шчырае жаданне дапамагчы асаблівым дзецям і прыўнесці радасць у іх жыцці стала крыніцай натхнення для стварэння гэтага фестывалю. Адзначым, што студэнтка паспяхова выступіла з праектам на конкурсе студэнцкіх бізнес-ідэй інавацыйных стартапаў "ІнНаСтарт". Цяпер будучы пераможцам, плануе пакарыць рэспубліканскі ўзровень.

Увесь дзень на Фестывалі мастацтваў быў напоўнены непаўторнай атмасферай радасці, творчасці і салідарнасці. Дзеці з абмежаванымі магчымасцямі праявілі свае таленты ў розных сферах мастацтва. Яны выконвалі песні, танчылі і ўмела ігралі на музычных інструментах, здзіўляючы ўсіх сваімі навыкамі і непадробным запалам да творчасці.

Арганізатары Фестывалю мастацтваў пастараліся стварыць камфортныя ўмовы для дзяцей з парушэннямі псіхафізічнага развіцця. Усе перашкоды былі пераадолены, і кожнае дзіця змагло праявіць сябе ў поўнай меры. Валанцёры і студэнты-памочнікі аказвалі ўсю неабходную падтрымку і дапамагалі дзецям адчуваць сябе ўпэўнена на сцэне.

Фестываль мастацтваў з удзелам дзяцей з абмежаванымі магчымасцямі стаў важным крокам у інклюзіўнай адукацыі і інтэграцыі. Ён паказаў, што кожнае дзіця, незалежна ад сваіх асаблівасцей, мае права на самавыяўленне і паўнацэнны ўдзел у культурным жыцці грамадства.