Ганаровае званне «Заслужаны дзеяч навукі Рэспублікі Беларусь» прысвоена загадчыку кафедры філасофіі педагагічнага факультэта Гродзенскага дзяржаўнага ўніверсітэта імя Янкі Купалы, прафесару, доктару філасофскіх навук Чэславу Станіслававічу Кірвелю.

У 1972 году Чэслаў Станіслававіч Кірвель скончыў філасофскі факультэт Ленінградскага дзяржаўнага ўніверсітэта, у 1976 годзе - аспірантуру, а ў 1977 годзе стаў кандыдатам філасофскіх навук.

На пасаду загадчыка кафедры філасофіі ГрДУ імя Янкі Купалы быў абраны ў 1981 годзе, у 1990-ым паспяхова абараніў доктарскую дысертацыю ў Ленінградскім дзяржаўным універсітэце на тэму «Утопія як форма асваення сацыяльнай рэальнасці». У 1991 годзе яму прысвоілі вучонае званне прафесара.

Вучоны з'яўляецца аўтарам больш за 270 навуковых прац. Чэслаў Станіслававіч Кірвель унёс значны ўклад у развіццё тэорыі ўтопіі і ўсёй навуковай футуралогіі, істотна ўзбагаціў сацыяльную глабалістыку, прапанаваў канцэптуальна новае разуменне сацыякультурных і геапалітычных працэсаў сучаснасці, у прыватнасці - праблем і перспектыў развіцця ўсходнеславянскага свету.

Неаднаразова прафесар выступаў ініцыятарам і арганізатарам буйных міжнародных канферэнцый, міжнароднай філасофскай школы (сумесна з СПБДУ), з'яўляўся Старшынёй спецыялізаванага Савета па абароне кандыдацкіх дысертацый. Больш за 30 гадоў кіраваў распрацоўкай навукова-даследчых тэм, што фінансуюцца Міністэрствам адукацыі.

Чэслаў Станіслававіч Кірвель таксама з'яўляецца стваральнікам і кіраўніком дзеючага гарадскога тэарэтыка-метадалагічнага семінара «Актуальныя праблемы сучаснага сацыягуманітарнага ведання».

У 2004 годзе вучоны ўдастоены нагруднага знака «Выдатнік адукацыі Рэспублікі Беларусь». У 2005 годзе імя прафесара Чэслава Станіслававіча Кірвеля ўнесена ў Кнігу славы Гродзенскай вобласці за вялікі ўклад у развіццё філасофскіх навук, падрыхтоўку маладых навукоўцаў і спецыялістаў, удасканаленне вучэбна-метадычнай і выхаваўчай дзейнасці. У гэтым жа годзе вучоны ўзнагароджаны медалямі «Францыска Скарыны» і «За заслугі перад Гродзенскім дзяржаўным універсітэтам імя Янкі Купалы». У 2008 годзе Пленум праўлення Беларускага славянскага камітэта ўзнагародзіў прафесара медалём за актыўны ўдзел у развіцці навуковых і культурных сувязяў паміж славянскімі народамі. У 2012 годзе Чэслаў Станіслававіч Кірвель стаў лаўрэатам III  Міжнароднага славянскага літаратурнага форуму «Залаты Віцязь» у намінацыі «Публіцыстыка», а ў 2013 годзе абраны сапраўдным членам Пятроўскай акадэміі навук і мастацтваў.