Мерапрыемства сабрала больш за 200 удзельнікаў з Беларусі і Расіі – гэта выкладчыкі, аспіранты, магістранты і студэнты ГрДУ імя Янкі Купалы, Маскоўскага гарадскога універсітэта ўпраўлення Урада Масквы імя Ю.М. Лужкова, Наўгародскага дзяржаўнага ўніверсітэта імя Яраслава Мудрага, Расійскай мытнай акадэміі, Тамбоўскага дзяржаўнага ўніверсітэта Г.Р. Дзяржавіна, Уральскага дзяржаўнага эканамічнага ўніверсітэта, Маскоўскага дзяржаўнага ўніверсітэта імя М. В. Ламаносава.

Праца канферэнцыі выбудавана ў двух напрамках – прэзентацыя пленарных дакладаў і секцыйных даследаванняў. Удзельнікі абмеркавалі актуальныя пытанні абароны правоў спажыўцоў у лічбавай эпосе. Яны абмяняліся вопытам і ведамі, а таксама вызначылі вектары для далейшага супрацоўніцтва з мэтай паляпшэння заканадаўства ў сферы абароны правоў спажыўцоў.

– Мы вельмі рады бачыць такую вялікую цікавасць студэнтаў і экспертаў да абмеркавання пытанняў абароны правоў спажыўцоў. Наша мэта – не толькі даць удзельнікам форуму новыя веды, але і сумесна распрацаваць канструктыўныя рэкамендацыі па паляпшэнні заканадаўства ў гэтай галіне. Мы спадзяемся, што вынікі гэтага круглага стала будуць карыснымі для развіцця лічбавага права і павышэння ўзроўню абароны правоў спажыўцоў не толькі ў нашых краінах, але і ў сусветным маштабе, – расказаў прафесар, доктар юрыдычных навук, загадчык кафедры грамадзянскага права і працэсу ГрДУ імя Янкі Купалы. Ігар Мартыненка.

Запрошаны госць - прафесар кафедры грамадзянскага права Маскоўскага дзяржаўнага ўніверсітэта імя М.В. Ламаносава, доктар юрыдычных навук, прафесар Андрэй Шарстабітаў падкрэсліў, што веданне закона ў эпоху цыфравізацыі і развіцця маркетплэйсаў дапамагае пазбегнуць махлярства і атрымаць кампенсацыю ў выпадку парушэння правоў спажыўца з боку прадаўцоў і пастаўшчыкоў паслуг.

Мерапрыемства накіравана таксама на ўмацаванне міжнароднага супрацоўніцтва ў галіне абароны правоў спажыўцоў і садзейнічае развіццю лічбавага права як інструмента абароны інтарэсаў спажыўцоў Беларусі і Расіі.