Рэктар польскага ўніверсітэта Казімеж Карольчак адзначыў, што рады цяперашняй сустрэчы па многіх прычынах. Паводле слоў госця, гэта яго першы візіт і ў Беларусь, і ў Гродна. Дарэчы, наш горад польскаму рэктару цікавы з гістарычнага пункту гледжання, так як па адукацыі ён з'яўляецца гісторыкам, і падчас экскурсій плануе бліжэй пазнаёміцца з гісторыка-культурнай спадчынай Гродна.

Вітаючы адміністрацыю ГрДУ імя Янкі Купалы, Казімеж Карольчак таксама падкрэсліў, што ў двух універсітэтаў ёсць планы, якія неабходна рэалізаваць. У сваю чаргу прарэктар па вучэбнай рабоце купалаўскага ўніверсітэта Юрый Бялых дадаў, што сённяшняя сустрэча дасць новы імпульс і выведзе ўніверсітэты на новы ўзровень развіцця супрацоўніцтва.

- Кракаўскі педагагічны ўніверсітэт вельмі добра вядомы ў купалаўскім універсітэце. Супрацоўніцтва паміж нашымі ўстановамі пастаянна развіваецца дзякуючы ўзаемадзеянню на ўзроўні ўніверсітэта і дзякуючы асабістым кантактам выкладчыкаў, - адзначыў Юрый Бялых.

У рамках сустрэчы быў перападпісаны дагавор аб супрацоўніцтве. Як падкрэсліў рэктар ГрДУ імя Янкі Купалы Андрэй Кароль, новы дакумент створаны для рэальнай працы, рэалізацыі ўжо намечаных планаў, для атрымання эфектыўных вынікаў па выніках супрацоўніцтва.

Дакумент прадугледжвае арганізацыю сумесных навуковых канферэнцый і форумаў, правядзенне сумесных навуковых даследаванняў, прыцягненне навукоўцаў да ўдзелу ў праграме «Запрошаны прафесар», пашырэнне абмену выкладчыкамі, дактарантамі і студэнтамі ў рамках праграм акадэмічнай мабільнасці Erasmus і Erasmus +, удзел студэнтаў у міжнародных моладзевых фестывалях, а таксама шэраг іншых мерапрыемстваў.

У прыватнасці, філалагічны факультэт купалаўскага ўніверсітэта плануе арганізаваць кароткатэрміновыя візіты ў Педагагічны ўніверсітэт імя Камісіі народнай адукацыі ў Кракаве з мэтай знаёмства з установай і абмену досведам паміж студэнтамі. Акрамя таго, пачаць сумесныя даследаванні ў галіне паланістыкі, беларускай і польскай філалогіі, лексікалогіі. Польскія калегі зацікаўлены ва ўзаемадзеянні ў рамках еўрапейскіх грантаў, дзякуючы якім выкладчыкі ўніверсітэтаў змогуць напісаць новыя падручнікі, падрыхтаваць навуковыя артыкулы для часопісаў, абмяняцца публікацыямі. Таксама на сустрэчы прагучала прапанова арганізаваць летнія школы для студэнтаў па вывучэнні польскай і рускай моў, культуры і гісторыі двух народаў.

Як адзначыла дэкан факультэта матэматыкі і інфарматыкі Алена Лівак, з нядаўняга часу факультэт пачаў супрацоўніцтва з факультэтам фізікі, матэматыкі і тэхнікі Педагагічнага ўніверсітэта імя Камісіі народнай адукацыі ў Кракаве. У планах у калегаў - падрыхтаваць сеткавую адукацыйную праграму па інфарматыцы, а таксама курс па праграмаванні для польскіх студэнтаў.

–Не сакрэт, што Гродзенскі дзяржаўны ўніверсітэт імя Янкі Купалы даволі моцны ў праграмаванні. Мы маем вельмі цесныя кантакты практычна з усімі IT-кампаніямі, таму маглі б наладзіць эфектыўнае ўзаемадзеянне ў гэтай сферы, - патлумачыла Алена Мікалаеўна.

Актуальным для ўніверсітэтаў з'яўляецца супрацоўніцтва ў галіне студэнцкага самакіравання. На заканчэнне сустрэчы прарэктар па выхаваўчай працы ГрДУ імя Янкі Купалы Васілій Сянько запрасіў прадстаўнікоў з польскага ўніверсітэта на міжнародны студэнцкі форум «Полікультурны дыялог Прынямоння: моладзь і будучыня», які пройдзе ў Гродне ў ліпені гэтага года.