Удзельнікі мерапрыемства змаглі прасякнуць атмасферай ваеннай адукацыі і асабіста ўпэўніцца ў тым, што ваенны факультэт ГрДУ імя Янкі Купалы мае ўсе магчымасці для якаснага і паўнацэннага навучання будучых афіцэраў. Мерапрыемства арганізавана сумесна з ваенным камісарыятам Гродзенскай вобласці.

− Ваенны факультэт ажыццяўляе падрыхтоўку па дзвюх спецыяльнасцях: «Тылавое забеспячэнне войскаў» і «Фізічная культура». Навучанне праходзіць на працягу 4 гадоў за рахунак сродкаў рэспубліканскага бюджэту. Падчас навучання курсанты атрымліваюць як тэарытычныя веды, так і практычныя навыкі, якія паспяхова прымяняюцца ў рабоце, - расказаў намеснік начальніка ваеннага факультэта ГрДУ імя Янкі Купалы па ідэалагічнай рабоце, падпалкоўнік Яўген Скіба.

У рамках Дня адчыненых дзвярэй юнакі і дзяўчаты азнаёміліся з вучэбнымі пляцоўкамі і лекцыйнымі аўдыторыямі, дзе праводзяцца заняткі і практычныя трэніроўкі. Арганізаваныя экскурсіі дазволілі наведвальнікам бліжэй пазнаёміцца з асноўнымі акадэмічнымі праграмамі, прапанаванымі на факультэце, а таксама з падрабязнасцямі студэнцкага жыцця і ўладкаваннем побыту.

− Ваенны камісарыят Гродзенскай вобласці актыўна прымае ўдзел у мерапрыемствах ваенна-патрыятычнай накіраванасці, ваенна-прафесійнай арыентацыі для грамадзянскай моладзі. Вельмі важна ў наш час прывіваць моладзі пачуццё патрыятызму, - падзялілася начальнік групы арганізацыі адбору на ваенную службу ваеннага камісарыята Гродзенскай вобласці, старшы лейтэнант Вікторыя Палтарацкая.

Старшакласнікам і іх бацькам расказалі аб перавагах навучання на ваенным факультэце Купалаўскага ўніверсітэта і аб спецыфіцы ваеннай прафесіі. На мерапрыемстве прысутнічалі студэнты і выкладчыкі, якія з задавальненнем падзяліліся сваім вопытам і ведамі аб працэсе навучання, міжнародных стажыроўках, спаборніцтвах і далейшых кар'ерных магчымасцях пасля заканчэння ўніверсітэта.

Дзень адчыненых дзвярэй на ваенным факультэце ГрДУ імя Янкі Купалы стаў сапраўдным святам для ўсіх прысутных. Многія наведвальнікі засталіся ўражаныя маштабам адукацыйнага працэсу, а таксама ацанілі прафесіяналізм і добразычлівасць выкладчыцкага складу.

− Другі раз наведваю Дзень адчыненых дзвярэй на ваенным факультэце і сур'ёзна задумваюся над паступленнем у ГрДУ імя Янкі Купалы. Я хацеў бы стаць вайскоўцам, каб абараняць Радзіму, - расказаў навучэнец Казлоўшчынскай сярэдняй школы Аляксей Шалесны.

Навучэнец Казлоўшчынскай сярэдняй школы Мікіта Маргун не толькі застаўся пад уражаннем ад смачнай салдацкай кашы, але і выявіў жаданне стаць курсантам ваеннага факультэта. Малады чалавек лічыць, што так ён зможа развіць навыкі лідарства, тактычнага мыслення, прыняцця рашэнняў у стрэсавых сітуацыях і каманднай працы, якія будуць карыснымі ў любой прафесіі.

− Ніколі б не падумала, што мне будзе блізкая і цікавая ваенная дзейнасць. Цяпер я сур'ёзна задумалася аб паступленні менавіта сюды, на ваенны факультэт. Варта паспрабаваць, – падзялілася навучэнка Вердаміцкай сярэдняй школы Карына Зень.

Такія мерапрыемствы дазваляюць будучым абітурыентам зрабіць правільны выбар навучальнай установы і спецыяльнасці, а таксама паўнацэнна прасякнуцца атмасферай студэнцтва. Вучоба на ваенным факультэце можа стаць пачаткам цікавай і паспяховай кар'еры ў ваеннай сферы, і многія наведвальнікі Дня адчыненых дзвярэй далі зразумець, што яны гатовы прыняць гэты выклік.