На базе Беларускага дзяржаўнага эканамічнага ўніверсітэта пры падтрымцы Міністэрства адукацыі прайшла рэспубліканская навукова-практычная канферэнцыя студэнтаў і маладых навукоўцаў «Сучасны механізм функцыянавання гандлёвага бізнесу і турыстычнай індустрыі ў Рэспубліцы Беларусь: рэальнасць і перспектывы».На сустрэчы ўдзельнікі ўсебакова абмеркавалі назапашаны вопыт у галіне даследаванняў гандлёвага бізнесу і турыстычнай індустрыі ў сучасных умовах.
Міністр гандлю Уладзімір Васільевіч Калтовіч распавёў аб канцэпцыі развіцця гандлю Рэспублікі Беларусь. Міністр адзначыў, што гандлёвая галіна з'яўляецца індыкатарам стану эканомікі любой краіны, паколькі менавіта ў гандлі падводзяцца вынікі дзейнасці вытворцаў прадукцыі з пункту гледжання іх канкурэнтаздольнасці.
Са спецыфікай падрыхтоўкі кадраў эканамічнага профілю ва ўмовах інтэграцыйных працэсаў і ў рамках патрабаванняў Балонскага працэсу ўдзельнікаў сустрэчы пазнаёміла дэкан факультэта эканомікі і кіравання купалаўскага ВНУ Марына Яўгеньеўна Карпіцкая.
Акрамя таго, на канферэнцыі з дакладамі выступілі студэнт 2 курса спецыяльнасці «Сусветная эканоміка» Сямён Соркін і магістрант 1 курса спецыяльнасці «Сусветная эканоміка» Алёна Мартыненка.
Даклады і выступленні ўдзельнікаў тычыліся пытанняў развіцця эканамічнага патэнцыялу гандлю ва ўмовах фарміравання адзінай эканамічнай прасторы, аналізу сучасных праблем і перспектыў развіцця рэстараннага бізнесу, кіравання камерцыйнай дзейнасцю на ўнутраным і знешнім рынках, забеспячэння комплекснага развіцця турыстычнай індустрыі Беларусі на аснове інавацыйных тэхналогій.
З усімі навінамі факультэта эканомікі і кіравання можна азнаёміцца тут.