Рэктар Купалаўскага ўніверсітэта Ірына Кітурка прыме ўдзел у Другой Нацыянальнай школе рэктараў, якая адбудзецца 26–27 жніўня ў Мінску. Мерапрыемства, арганізаванае Міністэрствам адукацыі Рэспублікі Беларусь, стане ключавой падзеяй у сферы вышэйшай адукацыі. Парадак дня форуму ахоплівае апераджальную падрыхтоўку кадраў, тэхналагічны суверэнітэт, выхаванне ў лічбавым асяроддзі і экспартны патэнцыял беларускіх універсітэтаў.
Для абмеркавання гэтых пытанняў вызначаны чатыры вядучыя пляцоўкі - Белтэлерадыёкампанія, Міністэрства замежных спраў, Нацыянальная акадэмія навук і Парк высокіх тэхналогій. У форуме прымуць удзел рэктары вядучых універсітэтаў, кіраўнікі профільных ведамстваў, прадстаўнікі акадэмічнай навукі, ПВТ і дзелавых колаў. Адметная асаблівасць мерапрыемства - выязны фармат, які дазваляе сумяшчаць дыскусіі з вывучэннем лепшых практык на профільных пляцоўках.
Першы дзень пачнецца ў Белтэлерадыёкампаніі з абмеркавання медыягігіены і выхавання моладзі ў лічбавым асяроддзі, уключаючы стварэнне і вядзенне Рэестра стваральных сеткавых аўтараў, механізмы процідзеяння недакладнай інфармацыі, распрацоўку інструментаў ацэнкі інстытута куратарства і стварэнне шматпрофільных маладзёжных рэдакцый на базе студэнцкіх. Потым праца працягнецца ў Міністэрстве замежных спраў, дзе эксперты разгледзяць экспарт адукацыйных паслуг, інтэграцыю ВНУ ў БРІКС+, ШАС і ЕАЭС, асаблівасці працы на рынках Паўднёва-Усходняй Азіі, Афрыкі і Лацінскай Амерыкі, а таксама стратэгіі прыцягнення замежных студэнтаў. Важнай часткай праграмы стане ўскладанне кветак да Манумента Перамогі.
На пляцоўцы Нацыянальнай акадэміі навук абмяркуюць камерцыялізацыю распрацовак, трансфер тэхналогій у рэальны сектар, інтэграцыю вузаўскай і акадэмічнай навукі і павышэнне эфектыўнасці дысертацыйных саветаў. Завершыцца першы дзень у Парку высокіх тэхналогій дыскусіяй пра этыку штучнага інтэлекту, рэгуляванне нейрасетак у навучальным працэсе, лічбавую інфраструктуру ВНУ і кібербяспеку.
Другі дзень праграмы пачнецца з азнаямлення з лабараторыямі Нацыянальнага дзіцячага тэхнапарку. Кульмінацыяй мерапрыемства стане пленарнае пасяджэнне пад кіраўніцтвам Міністра адукацыі Андрэя Іванца, дзе адбудзецца адкрытая размова па выніках усіх выязных секцый.
Па выніках работы форуму будзе прынята рэзалюцыя і зацверджаны пакет кіраўнічых рэкамендацый для сістэмы вышэйшай адукацыі, якія вызначаць стратэгічныя арыенціры развіцця і адаптацыі беларускіх універсітэтаў да сучасных выклікаў.
Гродзенскі дзяржаўны ўніверсітэт імя Янкі Купалы