У мінулыя выхадныя гарадскі пасёлак Воранава стаў сапраўднай сталіцай аднаго з галоўных гастранамічных сімвалаў Беларусі - бульбы. 22 жніўня тут прайшоў бульба-фэст "Воранаўскі дранік". У лік удзельнікаў мерапрыемства ўвайшоў прарэктар па ідэалагічнай і выхаваўчай рабоце Гродзенскага дзяржаўнага ўніверсітэта імя Янкі Купалы Васілій Сянько.
Пасля афіцыйнага адкрыцця самога фестывалю і віншавання ўсіх прысутных з 490-годдзем з дня ўтварэння Воранава на галоўнай сцэне свята пачалася маштабная канцэртная праграма. У ёй узялі ўдзел музычны тэатр "Рада", арт-група "Беларусы", шоу-балеты "Трыяда" і "Мальдзіні", а таксама гурты "Сэрца трох", "Брэнд Бэнд" і "На-На".
Праграма фестывалю была насычанай. Для гасцей свята прайшлі майстар-класы па прыгатаванні дранікаў ад носьбітаў традыцый і байкераў, разгарнуліся тэматычныя пляцоўкі ад сельскагаспадарчых прадпрыемстваў Воранаўскага раёна з дэгустацыяй страў з цёртай бульбы, адбыліся спартыўныя спаборніцтвы па сілавым экстрыме. Таксама прысутныя змаглі наведаць горад майстроў, выставу-продаж вырабаў ручной працы і гульнявую сямейную пляцоўку "Дранік-ПІКНІК!".
Яркай часткай мерапрыемства стаў ІХ адкрыты абласны фестываль гульні "Карнавал весялосці", у рамках якога калектывы з усёй Гродзенскай вобласці дэманстравалі свае ўнікальныя забаўляльныя праграмы.
Фіналам святкавання стала цырымонія ўзнагароджання пераможцаў конкурсаў бульба-фэсту, маштабны святочны салют, выступленне кавер-групы і святочная дыскатэка.
Гродзенскі дзяржаўны ўніверсітэт імя Янкі Купалы