Візіт у Купалаўскі ўніверсітэт пачаўся з экскурсіі. Дэкан факультэта эканомікі і кіравання Марына Карпіцкая пазнаёміла Алену Васільеўну з інфраструктурай факультэта, навуковай бібліятэкай, камп'ютарнымі класамі і вучэбнымі аўдыторыямі.

У рамках адукацыйнай часткі сваёй паездкі прафесар правяла для студэнтаў другога курса спецыяльнасці «Эканоміка і кіраванне» цыкл лекцыйных і семінарскіх заняткаў па дысцыпліне «Менеджмент арганізацыі». Таксама Алена Васільеўна прыняла ўдзел у правядзенні круглага стала з актывам студэнцкага навуковага таварыства факультэта эканомікі і кіравання. Тэма круглага стала – «Праблемы кіравання рызыкамі пры рэалізацыі праектаў».

Завяршылася наведванне Купалаўскага ўніверсітэта сустрэчай прафесара Санкт-Пецярбургскага дзяржаўнага эканамічнага ўніверсітэта Алены Васільевай з адміністрацыяй факультэта эканомікі і кіравання і загадчыкамі кафедраў. Бакі вызначылі напрамкі перспектыўнага супрацоўніцтва ў навуковай і навучальнай сферах.

У чарговы раз сустрэча ў рамках праграмы «Запрошаны прафесар» дазволіла не толькі пашырыць веды студэнтаў і сфарміраваць у іх новыя навыкі, але і ўмацаваць сяброўскія адносіны паміж ВНУ розных краін.