Выкладчыкі філалагічнага факультэта Гродзенскага дзяржаўнага ўніверсітэта імя Янкі Купалы прынялі актыўны ўдзел у VIII Міжнароднай навукова-практычнай канферэнцыі «Мова і культура ў сучасным свеце», арганізаванай факультэтам рускай філалогіі і замежных моў Пскоўскага дзяржаўнага ўніверсітэта.
У рамках работы секцыі «Прымяненне лічбавых тэхналогій і штучнага інтэлекту ў лінгвістыцы і навучанні замежным мовам» з анлайн-дакладам на тэму «Штучны інтэлект у лінгвадыдактыцы: ад інструментаў да адукацыйных рашэнняў» выступілі прадстаўнікі кафедры англійскай філалогіі: загадчык кафедры Анастасія Дудзько, дацэнт Наталля Леўчанка і старшы выкладчык Святлана Дашкевіч.
Даклад быў прысвечаны актуальным пытанням інтэграцыі лічбавых тэхналогій і інструментаў штучнага інтэлекту ў працэс навучання замежным мовам у вышэйшай школе. У выступленні купалаўцы прадставілі вынікі практычнага ўкаранення сучасных лічбавых рэсурсаў, а таксама разгледзелі перспектывы іх выкарыстання для павышэння эфектыўнасці навучання, развіцця аўтаномнасці студэнтаў і фарміравання камунікатыўнай кампетэнцыі.
Падчас выступлення выкладчыкі Купалаўскага ўніверсітэта прапанавалі калегам прыняць удзел у інтэрактыўным анлайн-апытанні, каб выявіць частату выкарыстання лічбавых тэхналогій і штучнага інтэлекту ў выкладанні, ацаніць іх уплывы на матывацыю навучэнцаў і развіццё камунікатыўных навыкаў, а таксама вызначыць асноўныя цяжкасці, якія ўзнікаюць пры іх укараненні ў адукацыйны працэс. Атрыманыя вынікі былі прадэманстраваны ў рэжыме рэальнага часу і сталі падставай для наступнага абмеркавання.
Выступленне выклікала жывую цікавасць ва ўдзельнікаў канферэнцыі. У час дыскусіі былі закрануты пытанні метадычнага забеспячэння лічбавага навучання, тэхнічных магчымасцей адукацыйных устаноў і педагагічных стратэгій выкарыстання штучнага інтэлекту.
Удзел у канферэнцыі дазволіў абмяняцца навуковым і педагагічным вопытам з калегамі з розных адукацыйных устаноў, абмеркаваць сучасныя тэндэнцыі развіцця лінгвадыдактыкі і акрэсліць напрамкі далейшых даследаванняў у галіне лічбавага навучання.
Гродзенскі дзяржаўны ўніверсітэт імя Янкі Купалы